അമ്പൂരിയില്‍ ബേക്കറിയില്‍ നിന്ന് ഭക്ഷണം കഴിച്ച 13 പേര്‍ക്ക് ഭക്ഷ്യവിഷബാധയേറ്റു. എല്ലാവരും ആശുപത്രിയില്‍ ചികിത്സതേടി. ഇതില്‍ 8 പേര്‍ അമ്പൂരിയിലെ സ്വകാര്യ ആശുപത്രിയിലും കാരക്കോണത്തെ മെഡിക്കല്‍ കോളേജ് ആശുപത്രിയിലുമായി ചികിത്സയില്‍ തുടരുന്നു.കൂട്ടപ്പൂ വട്ടക്കുടി വീട്ടില്‍ ശ്രീധരന്‍നായര്‍, ഐശ്വര്യ, ഹരികൃഷ്ണന്‍, അമ്പൂരി തട്ടാമുക്ക് തുരുത്തേല്‍ ഏലമില്‍ സണ്ണി ജോസഫ്, ലീറ്റാ, അമ്പൂരി പാലക്കാട്ടു ഹൗസില്‍ സില്‍വി, എല്‍സ മറിയ ഫെബിന്‍, തുടിയാംകോണം വെള്ളപള്ളി വീട്ടില്‍ ലിസമ്മ, നോയല്‍, അമ്പൂരി കുരുംകുറ്റിയാണിയില്‍ സാന്റി ഷിജു, തട്ടാമുക്ക് കരിംപാണിയില്‍ നീതു എന്നിവര്‍ക്കാണ് ഭക്ഷ്യവിഷബാധയേറ്റത്.ബേക്കറി ഉടമ സണ്ണി ജോസഫും ചികിത്സയിലാണ്.ചികിത്സയിലുള്ളവര്‍ അമ്പൂരിയിലെ സാന്‍ജോ ബേക്കറിയില്‍നിന്ന് കഴിഞ്ഞദിവസമാണ് ചിക്കന്റോളും ബര്‍ഗറും വാങ്ങി കഴിച്ചത്. തുടര്‍ന്ന് ഛര്‍ദിയും വയറിളക്കവും ഉണ്ടായതിനെത്തുടര്‍ന്ന് ആശുപത്രികളില്‍ ചികിത്സ തേടിയപ്പോഴാണ് ഭക്ഷ്യവിഷബാധയാണെന്ന് സ്ഥിരീകരിച്ചതെന്ന് ആരോഗ്യ വകുപ്പ് അധികൃതര്‍ പറഞ്ഞു.
ഭക്ഷ്യസുരക്ഷ, ആരോഗ്യവകുപ്പ് ഉദ്യോഗസ്ഥരെത്തി പരിശോധന നടത്തിയ ശേഷം ബേക്കറി സീല്‍ ചെയ്തു
