ദുബായ്: സുരക്ഷിതമല്ലാത്ത ഉൽപ്പന്നങ്ങൾ വിപണിയിൽ നിരോധിച്ച് അബുദാബി. 40-ലധികം ഉൽപ്പന്നങ്ങൾ യുഎഇ വിപണിയിൽ മായം കലർന്നതും സുരക്ഷിതമല്ലാത്തതുമായി കണക്കാക്കിയിട്ടുണ്ട്. പട്ടികയിൽ, ബോഡി ബിൽഡിംഗ്, ലൈംഗിക വർദ്ധനവ്, ഭാരം കുറയ്ക്കൽ, സൗന്ദര്യവർദ്ധക വസ്തുക്കൾ അല്ലെങ്കിൽ മറ്റ് ആരോഗ്യ സംബന്ധമായ കാരണങ്ങൾക്കായി വിപണനം ചെയ്യുന്ന മായം കലർന്നതോ മലിനമായതോ ആയ സപ്ലിമെന്റുകൾ ഉൾപ്പെടുന്നു.
ഇത്തരം ഉൽപ്പന്നങ്ങൾ ആരോഗ്യത്തെ ഗുരുതരമായി ബാധിക്കുമെന്നും സുരക്ഷിതമല്ലാത്ത സാഹചര്യങ്ങളിലാണ് ഇവ സൂക്ഷിച്ചിരുന്നതെന്നും ആരോഗ്യ വകുപ്പ് കണ്ടെത്തി. ഈ ഉൽപ്പന്നങ്ങളിൽ ചിലതിൽ യീസ്റ്റ്, പൂപ്പൽ, ബാക്ടീരിയ തുടങ്ങിയ ജൈവശാസ്ത്രപരമായ അംശങ്ങൾ അല്ലെങ്കിൽ ഘനലോഹങ്ങൾ എന്നിവയാൽ മലിനമായതായി കണ്ടെത്തി. മറ്റുള്ളവയിൽ പ്രഖ്യാപിക്കാത്ത ഫാർമസ്യൂട്ടിക്കൽ പദാർത്ഥത്തിൽ മായം ചേർത്തതായും പരിശോധനയിൽ തെളിഞ്ഞു.
നല്ല നിർമ്മാണ രീതികൾ (GMP) പാലിക്കാതെ വൃത്തിഹീനമായ സാഹചര്യങ്ങളിലാണ് ഈ മായം ചേർത്ത ഉൽപ്പന്നങ്ങൾ നിർമ്മിക്കുകയും സൂക്ഷിക്കുകയും ചെയ്യുന്നതെന്ന് ആരോഗ്യ വകുപ്പ് പറയുന്നു. കറുത്ത പാടുകൾ ഇല്ലാതാക്കാൻ എന്ന് അവകാശപ്പെട്ട് എത്തിച്ച ബ്രോൺസ് ടോൺ ബ്ലാക്ക് സ്പോട്ട് കറക്ടർ, ബയോ ക്ലെയറി ലൈറ്റ്നിങ് ബോഡി ലോഷൻ, റിനോ സൂപ്പർ ലോങ് ലാസ്റ്റിങ് 70000, പിങ്ക് പുസിക്യാറ്റ്, ഗുൾട്ട വൈറ്റ് ആന്റി ആക്നെ ക്രീം തുടങ്ങിയവയാണ് നിരോധിച്ച ഉൽപ്പന്നങ്ങളിൾ ഉൾപ്പെടുന്നത്. പൂർണ വിവരം അബുദാബി ആരോഗ്യ വകുപ്പിന്റെ വെബ്സൈറ്റിൽ ലഭിക്കും.
