ലഹരിക്കെതിരേ പോലീസിന്റെ ‘ഓപ്പറേഷൻ ഡി-ഹണ്ട്; സംസ്ഥാന വ്യാപക പരിശോധന, 244 പേർ അറസ്റ്റിൽ
തിരുവനന്തപുരം:ലഹരിമരുന്ന് ഉപയോഗവും വിൽപനയും തടയാനായി ഓപ്പറേഷൻ ഡി-ഹണ്ട് എന്ന പേരിൽ സംസ്ഥാന വ്യാപകമായി പോലീസിന്റെ പരിശോധന. സംസ്ഥാനത്തെ 1300 കേന്ദ്രങ്ങളിലായി ഞായറാഴ്ച നടന്ന പരിശോധനയിൽ 244 പേർ അറസ്റ്റിലായി. ലഹരിമരുന്ന് കൈവശം വെച്ചതിന് 246 കേസുകളും രജിസ്റ്റർ ചെയ്തു. ലക്ഷക്കണക്കിന് രൂപയുടെ എം.ഡി.എം.എ.യും പരിശോധനയിൽ പിടിച്ചെടുത്തിട്ടുണ്ട്
സംസ്ഥാനത്ത് ലഹരിമരുന്ന് ഉപയോഗം വർധിക്കുന്നതായുള്ള വിലയിരുത്തലിലാണ് ഞായറാഴ്ച പോലീസ് വിപുലമായ പരിശോധന നടത്തിയത്. തിരുവനന്തപുരം റൂറലിൽമാത്രം 48 പേരെ അറസ്റ്റ് ചെയ്തതായാണ് വിവരം. ലഹരിക്കേസുകളിൽ ഉൾപ്പെട്ട 38 പേരെ കരുതൽ തടങ്കലിലാക്കാനും ശുപാർശ ചെയ്തിട്ടുണ്ട്. വരുംദിവസങ്ങളിലും ഇത്തരം പരിശോധനകൾ തുടരാനാണ് പോലീസിന്റെ തീരുമാനം. ഞായറാഴ്ചത്തെ റെയ്ഡ് സംബന്ധിച്ച വിശദവിവരങ്ങൾ വൈകാതെ പോലീസ് ഔദ്യോഗികമായി പുറത്തുവിടും.
