മലപ്പുറം: മലപ്പുറത്ത് വൈദ്യുതി മോഷ്ടിച്ചു ജലസേചനം നടത്തിയായാൾ പിടിയിലായി. കക്കിടിപ്പുറം മൂർക്കത്തേതിൽ സജീവനാണ് (55) പിടിയിലായത്. പൊലീസ് ഇയാളെ കസ്റ്റഡിയിലെടുത്തു. ജലസേചനത്തിന് ഉപയോഗിച്ച പമ്പ്സെറ്റും പിടിച്ചെടുത്തിട്ടുണ്ട്. ഇയാൾക്ക് പിഴ ചുമത്തിയതായി വിജിലൻസ് പറഞ്ഞു.
ചങ്ങരംകുളം കക്കിടിപ്പുറത്താണ് സജീവൻ അനധികൃതമായി വൈദ്യുതി ഉപയോഗിച്ച്‌ ജലസേചനം നടത്തിയത്. വയലിന് സമീപത്തു കൂടെ പോകുന്ന വൈദ്യുതി കമ്പിയിൽനിന്ന് കമ്പി കൊളുത്തി വൈദ്യുതി എടുക്കുകയാണ് ഇയാൾ ചെയ്തിരുന്നത്. വയലിൽ കൃഷിക്ക് വെള്ളം പമ്പ് ചെയ്യാനായിരുന്നു വൈദ്യുതി മോഷണം. ഇത് ശ്രദ്ധയിൽ പെട്ട നാട്ടുകാർ അധികൃതരെ വിവരം അറിയിക്കുകയായിരുന്നു.
ഇതേ തുടർന്ന് ചങ്ങരംകുളം പൊലീസ്, ചങ്ങരംകുളം കെ.എസ്.ഇ.ബി അധികൃതർ എന്നിവരുടെ ഇടപെടലിലൂടെ മലപ്പുറം വിജിലൻസ് സംഘം സ്ഥലം സന്ദർശിക്കുകയും വൈദ്യുതി മോഷണം ബോധ്യപ്പെടുകയും ചെയ്തു. ഇതേ തുടർന്ന് ഇയാളെ കസ്റ്റഡിയിൽ എടുക്കുകയായിരുന്നു.
