പത്തനംതിട്ട: അമ്മയ്ക്കൊപ്പം സ്കൂട്ടറിൽ പോകുകയായിരുന്ന പത്താം ക്ലാസ് വിദ്യാർത്ഥിനി ടോറസ് ഇടിച്ച് മരിച്ചു. അങ്ങാടിക്കൽ വടക്ക് പാല നിൽക്കുന്നതിൽ കിഴക്കേതിൽ ജയ്‌സൺ – ഷീബ ദമ്പതികളുടെ മകൾ ജെസ്ന ജെയ്‌സൺ (15) ആണ് മരിച്ചത്. പത്തനംതിട്ട വള്ളിക്കോട്- വകയാർ റോഡിലെ കൊച്ചാലുംമൂട് ജംഗ്ഷനിൽ വച്ചായിരുന്നു അപകടം. ഇന്നു രാവിലെ ട്യൂഷൻ ക്ലാസിലേയ്ക്ക് പോകുന്നതിനിടെയാണ് ജെസ്ന ടോറസ് ഇടിച്ച് മരിച്ചത്.
ഷീബയ്ക്കൊപ്പം ട്യൂഷൻ ക്ലാസിലേയ്ക്ക് പോകുമ്പോൾ രാവിലെ ഏഴ് മണിയോടെയായിരുന്നു അപകടം. എതിർ ദിശയിൽ എത്തിയ ടോറസ് ഇരുവരും സഞ്ചരിച്ചിരുന്ന സ്കൂട്ടറിൽ ഇടിക്കുകയായിരുന്നു. റോഡിലേയ്ക്ക് തലയിടിച്ച് വീണ ജെസ്‌നയെ പത്തനംതിട്ടയിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഷീബ നിസാര പരിക്കുകളോടെ രക്ഷപ്പെട്ടു. പ്രമാടം നേതാജി ഹയർ സെക്കന്ററി സ്കൂളിലെ വിദ്യാർത്ഥിനിയാണ് ജെസ്ന.
