നന്ദ്യാല (ആന്ധ്രാപ്രദേശ്): ഒൻപതുകാരിയെ പീഡിപ്പിച്ച് കൊലപ്പെടുത്തിയ പ്രായപൂർത്തിയാകാത്ത ആൺകുട്ടികൾ പിടിയിൽ. പാർക്കില്‍ കളിച്ചുകൊണ്ടിരുന്ന പെൺകുട്ടിയെ പീഡിപ്പിച്ച ശേഷം മൂന്ന് ആൺകുട്ടികൾ കനാലിലേക്ക് തള്ളിയിടുകയാണ് ഉണ്ടായത്. ആന്ധ്രാപ്രദേശിലെ നന്ദ്യാല ജില്ലയിലാണ് ദാരുണ സംഭവം ഉണ്ടായത്.
കുട്ടിയ്ക്കായി പൊലീസിന്റെയും നാട്ടുകാരുടെയും നേതൃത്വത്തിൽ പ്രദേശത്ത് തിരച്ചിൽ തുടരുകയാണ്. ഞായറാഴ്ച വൈകീട്ട് 5 മണിയോടെയാണ് സംഭവം. പാർക്കിൽ കളിക്കുകയായിരുന്ന പെൺകുട്ടിയെ പ്രായപൂർത്തിയാകാത്ത ആൺകുട്ടികൾ ചേർന്ന് പീഡിപ്പിച്ചു. തുടർന്ന് ഇവർ പെൺകുട്ടിയെ മുച്ചുമാരി ഇറിഗേഷൻ കനാലിലേക്ക് തള്ളിയിട്ടു. പിടിയിലായ പ്രതികളെല്ലം മുച്ചുമാരി ഗ്രാമത്തിൽ നിന്നുള്ളവരാണെന്ന് നന്ദ്യാല എസ്പി രഘുവീര റെഡ്ഡി പറഞ്ഞു.
പിടിയിലായ രണ്ടുപേർക്ക് 15 വയസ്സും മറ്റേയാൾക്ക് 12 വയസ്സുമുണ്ട്. പെൺകുട്ടിയെ കാണാതായെന്ന് കാണിച്ച് മാതാപിതാക്കൾ നൽകിയ പരാതിയിലാണ് പൊലീസ് ആദ്യം കേസ് അന്വേഷിച്ചത്. പൊലീസ് നായ മണം പിടിച്ച് ആൺകുട്ടികളുടെ വീട്ടിലേക്ക് എത്തിയതോടെയാണ് കേസിൽ നിർണായകമായ വഴിത്തിരിവുണ്ടായത്. പെൺകുട്ടിയെ ഇതുവരെ കണ്ടെത്താനായിട്ടില്ലെന്നും കസ്റ്റഡിയിലുള്ള ആൺകുട്ടികളെ ചോദ്യം ചെയ്തുവരികയാണെന്നും പൊലീസ് അറിയിച്ചു. ദേശീയ ദുരന്ത നിവാരണ സേനയും തിരച്ചിലിനായി നന്ദ്യാലയിൽ എത്തിയിട്ടുണ്ട്. മൃതദേഹം കണ്ടെത്തുന്നത് വരെ പെൺകുട്ടി ബലാത്സംഗത്തിന് ഇരയായോ എന്ന് ഉറപ്പിക്കാൻ കഴിയില്ലെന്നും പൊലീസ് പറഞ്ഞു.
