തൃശൂർ: നഗരത്തിൽ ഓടിക്കൊണ്ടിരുന്ന ഒട്ടോറിക്ഷയ്ക്ക് തീപിടിച്ച് അപകടം. സിഎൻജി നിർമിത ഓട്ടോയ്ക്കാണ് തീപിടിച്ചത്. ഇന്ന് രാവിലെ ശക്തൻ സ്റ്റാൻഡിന് സമീപമായിരുന്നു അപകടം. സ്റ്റാൻഡിലെ ആകാശപാതക്ക് സമീപമുള്ള പച്ചക്കറി മാർക്കറ്റിന് സമീപത്ത് വെച്ചാണ്
ഓട്ടോയിൽ നിന്ന് തീ ഉയർന്നത്. സമീപത്തുകൂടി സഞ്ചരിച്ച ബൈക്ക് യാത്രികരാണ് ഓട്ടോയിൽ നിന്ന് തീ പടരുന്നത് ആദ്യം കണ്ടത്. തുടർന്ന് ഡ്രൈവറെ വിവരം അറിയിക്കുകയായിരുന്നു.
ഉടനെ തന്നെ ഡ്രൈവർ വാഹനം നിർത്തി ഇറങ്ങി ഓടിയതിനാൽ വൻ ദുരന്തം ഒഴിവായി. ഓട്ടോയിൽ യാത്രക്കാർ ഉണ്ടായിരുന്നില്ലെന്നതും ആശ്വാസമായി. അഗ്നിശമന സേന എത്തിയാണ് തീ അണച്ചത്. വാഹനത്തിന്റെ സിഎൻജി ടാങ്കിന് തീപിടിക്കാതിരുന്നതിനാൽ വലിയ പൊട്ടിത്തെറി ഒഴിവായി. ഗ്യാസ് ലീക്ക് ആയതാണ് തീപിടുത്തത്തിന് കാരണമെന്നാണ് സൂചന
