മുംബയ്: മൂന്നു വയസുകാരിയെ കൊന്ന് മൃതദേഹം കത്തിച്ച യുവാവ് അറസ്റ്റിൽ. മഹാരാഷ്ട്രയിലെ താനെയിലാണ് മുപ്പതുകാരനായ യുവാവ് അറസ്റ്റിലായത്. താനെയിലെ ഉല്ലാസ് നഗറിലുള്ള പെൺകുട്ടിയെയാണ് ബന്ധുവായ യുവാവ് കൊലപ്പെടുത്തി മൃതദേഹം കത്തിച്ചത്. ഈ മാസം 18നാണ് കുട്ടിയെ കാണാതായത്. തുടർന്ന് നടത്തിയ തിരച്ചിലാണ് കഴിഞ്ഞ ദിവസം കത്തിക്കരിഞ്ഞ നിലയിൽ മൃതദേഹം കണ്ടെടുത്തിയത്.
സംശയം തോന്നിയ പൊലീസ് ചോദ്യം ചെയ്തതിനെ തുടർന്നാണ് യുവാവ് കുറ്റം സമ്മതിച്ചത്. താൻ മനഃപൂർവം കൊലപാതകം നടത്തിയതല്ലെന്നും പ്രതി മൊഴി നൽകി. പെൺകുട്ടിയുമായി കളിച്ചുക്കൊണ്ടിരുന്നപ്പോൾ തമാശയ്ക്ക് അടിക്കുകയായിരുന്നു. അടിയുടെ ആഘാതത്തിൽ അടുക്കളയിലെ സ്ലാബിലിടിച്ചാണ് കുട്ടി മരിച്ചതെന്നും യുവാവ് പൊലീസിനോട് പറഞ്ഞു. സത്യം പുറത്തുവരാതിരിക്കാനാണ് യുവാവ് കുട്ടിയുടെ മൃതദേഹം തീയിട്ട് അടുത്തുളള കുറ്റിക്കാട്ടിൽ ഉപേക്ഷിച്ചത്. മൃതദേഹം പോസ്റ്റ്മോർട്ടത്തിനായി ആശുപത്രിയിലേക്ക് മാറ്റിയിട്ടുണ്ടെന്ന് പൊലീസ് അറിയിച്ചു.
