തിരുവനന്തപുരം: സുപ്രീംകോടതി ജാമ്യവ്യവസ്ഥകളിൽ ഇളവ് അനുവദിച്ചതിന് പിന്നാലെ പിഡിപി നേതാവ് അബ്ദുൾ നാസർ മദനി കേരളത്തിലേക്ക്. ഇന്ന് രാവിലെ ഒമ്പത് മണിക്കുള്ള വിമാനത്തിൽ ബെംഗളൂരുവിൽ നിന്നും തിരുവനന്തപുരത്ത് എത്തുന്ന മദനി , കാർ മാർഗം അൻവാർശ്ശേരിയിലേക്ക് പോകും.
അസുഖബാധിതനായ പിതാവിനൊപ്പം ഏതാനും ദിവസങ്ങൾ അൻവാർശ്ശേരിയിൽ കഴിഞ്ഞ ശേഷമുള്ള ചികിത്സാ കാര്യങ്ങളിൽ തീരുമാനം ഉണ്ടാകൂ എന്നാണ് മദനിയോട് അടുത്ത വൃത്തങ്ങൾ നൽകുന്ന സൂചന. പതിനഞ്ച് ദിവസത്തിൽ ഒരിക്കൽ വീടിനടുത്ത് പൊലീസ് സ്റ്റേഷനിൽ ഹാജരാകണമെന്ന് സുപ്രീംകോടതി നിർദ്ദേശിച്ചിട്ടുണ്ട്.
സുപ്രീംകോടതിയുടെ വിധി പകർപ്പ് വിചാരണക്കോടതിയിൽ എത്തിയതോടെയാണ് യാത്രക്ക് അവസരം ലഭിച്ചത്. ബംഗളൂരു വിട്ട് പോകരുതെന്ന് ജാമ്യ വ്യവസ്ഥ എടുത്ത് കളഞ്ഞാണ് കൊല്ലം കരുനാഗപ്പള്ളിയിലേക്ക് മടങ്ങാൻ സുപ്രീംകോടതി അനുമതി നൽകിയത്. ചികിത്സയ്ക്കായി വേണമെങ്കിൽ കൊല്ലത്തിന് പുറത്തേക്ക് പൊലീസ് അനുമതിയോടെ പോകാമെന്നും സുപ്രീംകോടതി ഉത്തരവിട്ടിട്ടുണ്ട്. ഇത്തവണ നാട്ടിൽ പോകാൻ കർണാടകത്തിൻറെ അകമ്പടി വേണമെന്നോ, കേരളാ പൊലീസ് സുരക്ഷ നൽകണമെന്നോ പൊലീസിന് നിർദ്ദേശം നൽകിയിട്ടില്ല
അബ്ദുൾ നാസർ മദനി ഇന്ന് തിരുവനന്തപുരത്തെത്തും
