കോഴിക്കോട്: പെരുമണ്ണയില്‍ കഞ്ചാവ് ഉപയോഗിച്ച ശേഷം ബസ് ഓടിച്ച ഡ്രൈവര്‍ അറസ്റ്റില്‍.പന്തീരങ്കാവ്-കോഴിക്കോട് റൂട്ടില്‍ ഓടുന്ന റോഡ് കിങ് എന്ന സിറ്റി ബസിലെ ഡ്രൈവറും പൊക്കുന്ന് കുറ്റിയില്‍ താഴം സ്വദേശിയുമായ ഫൈജാസ് (30) ആണ് അറസ്റ്റിലായത്.
വ്യാഴാഴ്ച ഉച്ചയ്ക്ക് 12ഓടെയാണ് സംഭവം. ഫൈജാസ് കഞ്ചാവ് ഉപയോഗിച്ച ശേഷമാണ് വാഹനം ഓടിക്കുന്നതെന്ന് പോലീസിന് രഹസ്യ വിവരം ലഭിച്ചിരുന്നു.
ഇതിനെ തുടർന്ന് പന്തീരങ്കാവ് പോലീസ്, പെരുമണ്ണയില്‍ വച്ച് പരിശോധന നടത്തുകയായിരുന്നു.ഫൈജാസില്‍ നിന്ന് കഞ്ചാവിന്റെ രൂക്ഷഗന്ധം അനുഭവപ്പെടുകയും പോക്കറ്റില്‍ നിന്ന് വലിക്കാന്‍ ഉപയോഗിച്ച കഞ്ചാവിന്റെ ബാക്കി കണ്ടെത്തുകയും ചെയ്തു.
തുടര്‍ന്ന് ബസ്സും ഡ്രൈവറെയും സഹിതം പന്തീരങ്കാവ് പോലീസ് കസ്റ്റഡിയില്‍ എടുത്തു.ഡ്രൈവറുടെ ലൈസന്‍സ് സസ്‌പെന്‍ഡ് ചെയ്യുന്നതിനായി റിപ്പോര്‍ട്ട് നല്‍കുമെന്ന് പന്തീരങ്കാവ് എസ് ഐ സുഭാഷ് ചന്ദ്രന്‍ പറഞ്ഞു.
