ഗുവാഹത്തി: യൂണിഫോമിടാത്തത് ചോദ്യം ചെയ്ത അധ്യാപകനെ വിദ്യാർത്ഥി കുത്തിക്കൊന്നു. രാജേഷ് ബറുവ ബെജവാഡ (55) ആണ് കൊല്ലപ്പെട്ടത്. അസമിലെ ശിവസാഗർ ജില്ലയിലെ സ്വകാര്യ സ്‌കൂളിലെ പതിനൊന്നാം ക്ലാസുകാരനാണ് പ്രതി. കെമിസ്ട്രി അധ്യാപകനാനെയാണ് വിദ്യാർത്ഥി കത്തിക്ക് കുത്തിയത്.കൗമാരക്കാരനെ പോലീസ് കസ്റ്റഡിയിലെടുത്ത് ചോദ്യം ചെയ്തുവരികയാണ്
ഗുരുതരമായി പരുക്കേറ്റ അധ്യാപകനെ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. തലേദിവസം ക്ലാസിലെ മോശം പ്രകടനം ചൂണ്ടിക്കാട്ടി അധ്യാപകൻ ഇതേ വിദ്യാർഥിയെ ശകാരിക്കുകയും മാതാപിതാക്കളെ കൊണ്ടുവരണമെന്ന് ആവശ്യപ്പെടുകയും ചെയ്തിരുന്നു. ക്ലാസിൽ നിന്നും വിദ്യാർഥിയെ ഇറക്കിവിട്ടതായും സഹപാഠികൾ പറയുന്നു. അടുത്ത ദിവസം രക്ഷിതാക്കളെ കൂട്ടാതെയും യൂണിഫോമില്ലാതെയും ക്ലാസിലെത്തിയ കുട്ടിയെ അധ്യാപകൻ എഴുന്നേൽപ്പിച്ചു നിർത്തി ശകാരിച്ചു. ഇതിനിടെയാണു വിദ്യാർഥി കത്തി കൊണ്ട് ആക്രമിച്ചത്.
