കായംകുളം: സിപിഎം ബ്രാഞ്ച് സെക്രട്ടറിയുടെ സാന്നിധ്യത്തിൽ ഗുണ്ടാസംഘങ്ങൾ സംഘടിപ്പിച്ച ജന്മദിനാഘോഷം. കരുനാഗപ്പള്ളി പുതിയകാവിന് സമീപത്തെ ബാറിലാണ് സിപിഎം പ്രാദേശിക നേതാവിന്റെ നേതൃത്വത്തിൽ ഗുണ്ടാസംഘങ്ങൾ ഒത്തുചേർന്നത്. കരീലക്കുളങ്ങര പൊലീസ് സ്റ്റേഷൻ പരിധിയിലെ ഒരു ഗുണ്ടാ നേതാവിന്റെ പിറന്നാളാഘോഷത്തിനാണ് സംഘം ഒത്തുകൂടിയത്. വാളുപയോഗിച്ചായിരുന്നു കേക്ക് മുറിച്ചത്. സംഭവത്തിന്റെ ദൃശ്യങ്ങൾ പുറത്തുവന്നതിന് പിന്നാലെ പൊലീസ് കേസെടുത്ത് അന്വേഷണം ആരംഭിച്ചു. സംഘം ചേർന്ന് ആയുധം കൈവശം വച്ചതിനാണ് പൊലീസ് കേസ് രജിസ്റ്റർ ചെയ്തിരിക്കുന്നത്.
ദേവികുളങ്ങര ലോക്കൽ കമ്മിറ്റിയുടെ പരിധിയിലെ ബ്രാഞ്ച് സെക്രട്ടറിയാണ് ഗുണ്ടാപ്പാർട്ടിയിൽ പങ്കെടുത്തത്. മുപ്പത് പേരടങ്ങുന്ന സംഘമാണ് ജന്മദിനാഘോഷത്തിനായി സംഘടിച്ചതെന്ന് പൊലീസിന് വിവരം ലഭിച്ചിട്ടുണ്ട്. ബ്രാഞ്ച് സെക്രട്ടറിയെ അന്വേഷിച്ച് കരുനാഗപ്പള്ളി പൊലീസ് കായംകുളത്തും പുതുപ്പള്ളിയിലും എത്തിയെങ്കിലും കണ്ടെത്താനായില്ല. രണ്ട് വർഷം മുൻപ് ദേവികുളങ്ങരയിൽ പരസ്യമായി വടിവാളുമായി ഭീകരാന്തരീക്ഷം സൃഷ്ടിച്ച സംഭവത്തിൽ കായംകുളം പൊലീസ് സ്റ്റേഷനിൽ ബ്രാഞ്ച് സെക്രട്ടറിക്കെതിരെ കേസുണ്ട്. കരീലക്കുളങ്ങര പൊലീസ് സ്റ്റേഷൻ പരിധിയിലെ മറ്റ് അഞ്ചുപേർ കൂടി സൽക്കാരത്തിൽ പങ്കെടുത്തിരുന്നു
