ആദ്യ കാലങ്ങളിൽ മിക്ക ആൻഡ്രോയിഡ് ഉപകരണങ്ങളിലും ഗൂഗിൾ അസിസ്റ്റാണ് ലഭ്യമായിരുന്നത്. 2016 ഓടെയായിരുന്നു ആൻഡ്രോയിഡ് ഫോണുകളിൽ ഗൂഗിൾ അസിസ്റ്റന്റിന്റെ കടന്നു വരവ്. ഉപയോക്താക്കൾക്ക് വോയിസ് കമാൻഡിലൂടെ ഫോണിനെ നിയന്ത്രിക്കാനാകുമെന്ന സവിശേഷതയുമായെത്തിയ ‘അസിസ്റ്റന്‍റി’ന് വലിയ സ്വീകാര്യതയും ലഭിച്ചിരുന്നു. എന്നാൽ എന്തിനും ഏതിനും എഐ ഉപയോഗിക്കുന്നവരുടെ എണ്ണം കൂടിക്കൂടി വരുന്ന സാഹചര്യത്തിൽ പല മാറ്റങ്ങളാണ് ദിനം പ്രതി സംഭവിക്കുന്നത്. ആർട്ടിഫിഷ്യൽ ഇന്‍റലിജൻസ് കൂടി സംയോജിപ്പിച്ച ജെമിനിയുടെ വരവോടെ ഗൂഗിൾ അസിസ്റ്റന്‍റ് അപ്രസക്തമായിരിക്കുകയാണ്. ഈ വർഷം തന്നെ അസിസ്റ്റന്റിന്റെ സേവനം അവസാനിപ്പിച്ച് ജെമിനിയെ പകരക്കാരനാക്കാനുള്ള തയാറെടുപ്പിലാണ് ഗൂഗിൾ.
അടുത്തിടെയാണ് ആൻഡ്രോയിഡ് 12നും മുകളിലേക്കും മാത്രമുള്ള വേർഷനുകളിലേക്ക് ജെമിനിയുടെ സേവനം കമ്പനി പരിമിതപ്പെടുത്തിയത്. ഇതിനാണ് ഇപ്പോൾ മാറ്റം വന്നത്. ഇനി എല്ലാ ആൻഡ്രോയിഡ് ഉപകരണങ്ങളിലും ജെമിനിയായിരിക്കും ഉണ്ടാവുക. ഗൂഗിൾ പ്ലേ സ്റ്റോറിലെ ജെമിനിയുടെ ലിസ്റ്റിങ് ഈ മാറ്റം വ്യക്തമാക്കുന്നുണ്ട്. പിക്സൽ, സാംസങ്, വൺപ്ലസ്, മോട്ടറോള തുടങ്ങിയ ബ്രാൻഡുകളിൽ പുറത്തിറങ്ങുന്ന പുതിയ ആൻഡ്രോയിഡ് ഫോണുകളിൽ ജെമിനിയാണ് ഡിഫോൾട്ട് അസിസ്റ്റന്‍റ്. ഈ സാഹചര്യത്തിലാണ് പൂർണമായും ഷിഫ്റ്റ് ചെയ്യാൻ ഗൂഗിൾ തയാറെടുക്കുന്നത്. ദശലക്ഷക്കണക്കിന് ഉപയോക്താക്കൾ ഇപ്പോൾ തന്നെ ജെമിനിയിലേക്ക് മാറിയെന്ന് ഗൂഗിൾ ചൂണ്ടിക്കാണിക്കുന്നു. ഈ വർഷം അവസാനത്തോടെ പൂർണമായും മാറ്റം നിലവിൽവരും.
കഴിഞ്ഞ കുറച്ച് മാസങ്ങളായി ജെമിനിയിലേക്ക് പുതിയ ഫീച്ചറുകൾ കൊണ്ടുവരുന്നതിൽ ഗൂഗിൾ നിരന്തരം പരിശ്രമിക്കുന്നുണ്ട്. ജെമിനി ആപ്പും അതിന്റെ ഏറ്റവും കഴിവുള്ള എഐ മോഡലുകളിലേക്കുള്ള ആക്‌സസ് നൽകുന്ന ജെമിനി അഡ്വാൻസ്ഡും ഇപ്പോൾ ഒമ്പത് ഇന്ത്യൻ ഭാഷകളിൽ ലഭ്യമാകുമെന്നാണ് ഗൂഗിൾ അറിയിച്ചിരിക്കുന്നത്. ഹിന്ദി, ബംഗാളി, ഗുജറാത്തി, കന്നഡ, മലയാളം, മറാത്തി, തമിഴ്, തെലുങ്ക്, ഉറുദു എന്നിവയാണ് ഈ ഒൻപത് ഭാഷകൾ. ഇവ കൂടാതെ, ഒൻപത് പ്രാദേശിക ഭാഷകൾ കൂടി ജെമിനി അഡ്വാൻസ്ഡിലേക്ക് സംയോജിപ്പിക്കും എന്നും കമ്പനി അറിയിച്ചിട്ടുണ്ട്. പുതിയ ഡാറ്റാ വിശകലന ശേഷികൾ, ഫയൽ അപ്ലോഡുകൾ, ഇംഗ്ലീഷിൽ ഗൂഗിൾ മെസേജിൽ ജെമിനിയുമായി ചാറ്റ് ചെയ്യാനുള്ള കഴിവ് എന്നിവയാണ് പുതിയതായി ഉൾപ്പെടുത്തിയിരിക്കുന്ന ഫീച്ചറുകൾ
