കോട്ടയം : കോട്ടയം ജില്ലയിലെ കിഴക്കൻ മലയോര മേഖലകളിൽ കനത്ത മഴ. വൻ തോതിൽ കൃഷിനാശമുണ്ടായി. ഒരു റബ്ബർ മെഷീൻപുര ഒഴുകിപ്പോയി. റോഡിൽ മുഴുവൻ കല്ലും മണ്ണും നിറഞ്ഞ ഗതാഗതം തടസ്സപ്പെട്ടിരിക്കുകയാണ്. തലനാട് വെള്ളാനിയിൽ ഉരുൾപൊട്ടലുണ്ടായി.വെള്ളാനി പ്രദേശം ഒറ്റപ്പെട്ട നിലയിലാണ്. ആളപായമില്ലെന്നാണ് വിവരം. മീനച്ചിലാറിന്റെ കൈവഴികളിലെല്ലാം ജലനിരപ്പ് ഉയരുന്ന സാഹചര്യമാണ്. മഴ തുടരുന്ന സാഹചര്യത്തിൽ തീക്കോയി വില്ലേജിലെ വെളിക്കുളം സ്കൂളിൽ റവന്യൂ വകുപ്പ് ക്യാമ്പ് തുറന്നു.
കനത്ത മഴയെത്തുടർന്ന് വാഗമൺ റോഡിലും മണ്ണിടിച്ചിലുണ്ടായി. മംഗളഗിരിയിൽ
മണ്ണിടിച്ചിലിനെ തുടർന്ന് ഗതാഗതം തടസ്സപ്പെട്ടു. തീക്കോയി, അടുക്കം, ഒറ്റയീട്ടി തുടങ്ങിയ പ്രദേശങ്ങളിൽ ശക്തമായ മഴ തുടരുകയാണ്.
