കൊച്ചി: ബസ് ഓടേണ്ട റൂട്ടാണ് എന്ന്തോന്നിയാൽ ഇക്കാര്യം മോട്ടോർ വാഹനവകുപ്പിന് അറിയിക്കാൻ അവസരം. പുതിയ ബസ് റൂട്ടുകൾ സംബന്ധിച്ച് ജനങ്ങളിൽ നിന്ന് സമഗ്ര സർവേ നടത്താൻ ഒരുങ്ങുകയാണ് വാഹനവകുപ്പ്.
ഗതാഗതമന്ത്രി കെ ബി ഗണേഷ് കുമാറിന്റെ നിർദേശപ്രകാരമാണ് അധികൃതർ സർവേ നടത്താൻ ഒരുങ്ങുന്നത്. ഇതുവരെ ബസ് ഓടാത്ത റൂട്ടുകളിലും സർവീസ് നിന്ന് പോയ റോഡുകളിലും പുതുതായി നിർമിച്ച റോഡുകളിലും തുടങ്ങേണ്ട ബസ് റൂട്ടുകൾ ജനങ്ങൾക്ക് സർവേയിലൂടെ നിർദേശിക്കാം. സൗകര്യമുള്ള എല്ലാ റോഡുകളിലും പൊതുഗതാഗത സൗകര്യം ലഭ്യമാക്കണമെന്നാണ് ഗതാഗതമന്ത്രിയുടെ നിർദേശം.
ആവശ്യമെങ്കിൽ നിലവിലുള്ള റൂട്ടുകളിൽ പുനഃക്രമീകരണം നടത്താനും മന്ത്രി ആവശ്യപ്പെട്ടിട്ടുണ്ട്. ജില്ലയിൽ പുതുതായി തുടങ്ങേണ്ട ബസ് റൂട്ടുകളുടെ വിവരങ്ങൾ kl07.mvd@kerala.gov.in ജനങ്ങൾക്ക് നിർദേശിക്കാമെന്ന് എറണാകുളം ആർടിഒ ജി അനന്തകൃഷ്ണൻ അറിയിച്ചു. പുതിയ സർവീസുകൾക്ക് സാധ്യതയുള്ളയിടങ്ങളിൽ സ്വകാര്യ ബസുകൾക്ക് പെർമിറ്റ് അനുവദിക്കും.
കൂടുതൽ യാത്രക്കാരുള്ള റൂട്ടുകളിൽ സർവീസ് നടത്താതെ ചില റൂട്ടുകളിൽ കെഎസ്ആർടിസി ആളില്ലാതെ സർവീസ് നടത്തുന്നതായി പരാതികളുണ്ട്. യാത്രക്കാരെ ലഭിക്കുന്ന റൂട്ടുകളിൽ കെഎസ്ആർടിസിയുടെ ചെറിയ ബസുകൾ ഓടിക്കാനാണ് തീരുമാനമെന്നും അധികൃതർ വ്യക്തമാക്കി.
