തിരുവനന്തപുരം: തിരുവനന്തപുരം കിളിമാനൂരിൽ ഇരുചക്ര വാഹനത്തിൽ സഞ്ചരിക്കുകയായിരുന്ന യുവതിയ്ക്ക് അജ്ഞാത സംഘത്തിന്റെ ആക്രമണം. ചെങ്കിക്കുന്ന് സ്വദേശിനിയായ യുവതിക്ക് നേരെയാണ് ആക്രമണമുണ്ടായത്. ബൈക്കിൽ യുവതിയെ പിൻതുടർന്നെത്തിയ സംഘം കെെയ്യിൽ കരുതിയിരുന്ന ആയുധം പോലുള്ള വസ്തു ഉപയോഗിച്ച് അടിച്ചു വീഴ്ത്തുകയായിരുന്നു. പ്രതികൾ രക്ഷപ്പെട്ടു. സംഭവത്തിൽ യുവതി നഗരൂർ പോലീസിൽ പരാതി നൽകി.
ചെങ്കിക്കുന്ന് കൊടുവഴന്നൂർ റോഡിൽ കിളിമാനൂർ ബ്ലോക്ക് പഞ്ചായത്ത് ഓഫീസിന് സമീപം ഇന്നലെ വൈകുന്നേരം 6.15 ഓടെ ആയിരുന്നു സംഭവം. വീഴ്ച്ചയിൽ യുവതിക്ക് കൈക്ക് പരുക്കേറ്റു. സംഭവത്തിൽ നഗരൂർ പൊലീസ് അന്വേഷണം ആരംഭിച്ചു.
