ഹൈദരാബാദ്: ഇന്ത്യൻ ബാഡ്മിന്റൺ താരം പി.വി. സിന്ധു വിവാഹിതയാകുന്നു. ഹൈദരാബാദ് സ്വദേശി വെങ്കടദത്ത സായിയാണ് വരൻ. സോഫ്റ്റ്‌വെയർ കമ്പനിയായ പൊസിഡെക്സ് ടെക്‌നോളജീസിന്റെ എക്സിക്യുട്ടീവ് ഡയറക്ടറാണ് വെങ്കടദത്ത സായി. ഡിസംബർ 22-ന് രാജസ്ഥാനിലെ ഉദയ്‌പുരിൽ വിവാഹ ചടങ്ങുകളും 24-ന് ഹൈദരാബാദിൽ വിവാഹ സത്കാരവും നടക്കും.
ഇരു കുടുംബങ്ങളും തമ്മിൽ ഏറെക്കാലമായി ബന്ധമുണ്ട്. ഒരുമാസം മുൻപാണ് വിവാഹക്കാര്യം തീരുമാനിച്ചതെന്ന് സിന്ധുവിന്റെ അച്ഛനും മുൻ വോളിബോൾ താരവുമായ പി.വി. രമണ പറഞ്ഞു. രണ്ട് ഒളിമ്പിക് മെഡലുകൾക്കുടമയാണ് പി വി സിന്ധു.
2016, 2020 ഒളിമ്പിക്സുകളിൽ മെഡൽജേതാവായ 29-കാരി കുറച്ചുകാലമായി അത്ര ഫോമിലായിരുന്നില്ല. എന്നാൽ, കഴിഞ്ഞദിവസം സയ്യിദ് മോദി ടൂർണമെന്റിലെ വനിതാ സിംഗിൾസിൽ കിരീടം നേടി. ജനുവരിയിൽ സിന്ധു വീണ്ടും മത്സരത്തിന്റെ തിരക്കുകളിലേക്ക് കടക്കുന്നതിനാൽ അതിനുമുൻപുള്ള ഇടവേളയിൽ വിവാഹം നടത്താൻ തീരുമാനിക്കുകയായിരുന്നെന്നും രമണ പറഞ്ഞു.
