കണ്ണൂർ: ഒട്ടും സുരക്ഷിതമല്ലാത്ത അന്തരീക്ഷത്തിലാണ് കുരുന്നുകൾ പഠിക്കുന്നത്. കണ്ണൂർ കൊട്ടിയൂരിലെ ഒറ്റപ്ലാവ് ഈസ്റ്റ് അങ്കണവാടിയിൽ നിന്നും രാജവെമ്പാലയെ കണ്ടെത്തി. അങ്കണവാടിയിലെ അടുക്കളയിൽ നിന്നുമാണ് രാജവെമ്പാലയെ പിടികൂടിയത്. ഇന്നലെ ഉച്ചയോടെ അങ്കണവാടിയുടെ അടുക്കള ഭാഗത്തായി ചുറ്റിയിരിക്കുന്ന നിലയിലായിരുന്നു പാമ്പ്. ജോലിക്കാരിയാണ് പാമ്പിനെ ആദ്യം കണ്ടത്.
ഭാഗ്യവശാൽ ഈ സമയം കുട്ടികൾ അങ്കണവാടിയിൽ ഉണ്ടായിരുന്നില്ല. മഴ മൂലം കുട്ടികളെ നേരത്തെ വീട്ടിൽ വിട്ടിരുന്നു അതിനാൽ വൻ അപകടമാണ് ഒഴിവായത്. കൊട്ടിയൂർ ഫോറസ്റ്റ് അധികൃതരെ വിവരം അറിയിച്ചതിനെ തുടർന്ന് ഉദ്യോഗസ്ഥർ സ്ഥലത്തെത്തി പമ്പിനെ പിടികൂടുകയായിരുന്നു. ഫൈസൽ വിളക്കോട്, തോമസ് കൊട്ടിയൂർ, ബിനോയ് എന്നിവരാണ് രാജവെമ്പാലയെ സാഹസികമായി പിടികൂടിയത്.
