ധാക്ക: ബംഗ്ലാദേശിൽ റസ്റ്റോറന്റിലുണ്ടായ അഗ്നിബാധയിൽ 43 പേർ വെന്തുമരിച്ചു. തലസ്ഥാനമായ ധാക്കയിലെ ബെയ്‌ലി റോഡിലെ റസ്റ്റോറന്റിലാണ് കഴിഞ്ഞ രാത്രിയിൽ അഗ്നിബാധയുണ്ടായത്. സംഭവത്തിൽ ഗുരുതരമായി പൊള്ളലേറ്റ 14 പേർ ചികിത്സയിലാണ്. 75 പേരെ അഗ്നിരക്ഷാസേന രക്ഷപ്പെടുത്തിയിട്ടുണ്ട്.
വ്യാഴാഴ്ച രാത്രി 9.50 ഓടെയാണ് ഏഴ് നില കെട്ടിടത്തിൽ തീപിടിത്തമുണ്ടായത്. വെള്ളിയാഴ്ച പുലർച്ചെ രണ്ട് മണിയോടെ ആരോഗ്യമന്ത്രി ഡോ. സാമന്ത ലാൽസെൻ ആണ് മാധ്യമങ്ങളോട് മരണവിവരം സ്ഥിരീകരിച്ചത്. 33 പേർ ഡി.എം.സി.എച്ചി.ലും 10 പേർ ഷെയ്ഖ് ഹസീന നാഷണൽ ഇൻസ്റ്റിറ്റ്യൂട്ട് ഓഫ് ബേൺ ആൻഡ് പ്ലാസ്റ്റിക് സർജറിയിലും വെച്ചാണ് മരിച്ചതെന്ന് മന്ത്രി പറഞ്ഞു. 14 പേർ ധാക്ക മെഡിക്കൽ കോളേജ് ആശുപത്രിയിൽ ചികിത്സയിലാണ്. 13 യൂണിറ്റ് അഗ്നിരക്ഷാ സേനയെത്തിയാണ് അഗ്നിബധ നിയന്ത്രണവിധേയമാക്കിയത്.
