റാബത്ത്: മൊറോക്കോയിലുണ്ടായ ഭൂചലനത്തിൽ മരണസംഖ്യ ആയിരം കടന്നു. 1200 ഓളം പേർക്ക് പരിക്കേറ്റു. നിരവധി പേർ ഇപ്പോഴും കെട്ടിടത്തിനടിയിൽ
കുടുങ്ങിക്കിടക്കുന്നതായാണ് റിപ്പോർട്ടുകൾ. ഇവരിൽ പലരുടെയും നില ഗുരുതരമാണ്
അപകടത്തിൽപ്പെട്ടവരെ രക്ഷിക്കാനുള്ള ശ്രമം പുരോഗമിക്കുകയാണ്. 1037 പേർ മരിച്ചതായാണ് ഔദ്യോഗിക കണക്കുകൾ. 1204 പേർക്ക് പരിക്കേറ്റതായും 721 പേരുടെ പരിക്കുകൾ ഗുരുതരമാണെന്നും മൊറോക്ക ആഭ്യന്തരമന്ത്രാലയം അറിയിച്ചു
6.8 തീവ്രത രേഖപ്പെടുത്തിയ ഭൂചലനം തലസ്ഥാനമായ റാബത്തിലും സമീപ പ്രദേശങ്ങളിലും കനത്ത
നാശനഷ്ടമുണ്ടാക്കി.പ്രാദേശിക സമയം രാത്രി 11 മണിക്ക് ശേഷമാണ് ഭൂചലനമുണ്ടായത്. നിരവധി ബഹുനില കെട്ടിടങ്ങളുൾപ്പെടെ തകർന്നുവീണു. വൈദ്യുതി ബന്ധം താറുമാറായി. റോഡുകൾ തകർന്നു.
ഭൂകമ്പം ദുരന്തം വിതച്ച മൊറോക്കോയ്ക്ക് സാധ്യമായ എല്ലാ സഹായവും ചെയ്യാൻ ഇന്ത്യ സന്നദ്ധമെന്ന് പ്രധാനമന്ത്രി നരേന്ദ്ര മോദി. മൊറോക്കോ ദുരന്തത്തിൽ അനുശോചനം അറിയിച്ചാണ് ജി 20 ഉച്ചകോടിയിൽ മോദി പ്രസംഗം തുടങ്ങിയത്.കഷ്ടപ്പാടിന്റെ ഈ സമയത്ത് ലോക സമൂഹം മുഴുവനായും മൊറോക്കോയ്ക്ക് ഒപ്പമുണ്ടെന്ന് മോദി പറഞ്ഞു. ഇന്ത്യയ്ക്ക് സാധ്യമായ എല്ലാ സഹായവും ചെയ്യാൻ രാജ്യം സന്നദ്ധമാണ്. മോദി അറിയിച്ചു.
