ഭോപ്പാല്‍ : മധ്യപ്രദേശിലെ ശിവപുരി ജില്ലയില്‍ മന്ത്രവാദത്തിന്റെ പേരില്‍ ആറുമാസം പ്രായമുള്ള കുഞ്ഞിനെ തലകീഴായി തീയുടെ മുകളില്‍ കെട്ടിത്തൂക്കി. തീയുടെ ചൂടും പുകയുമേറ്റ് കുഞ്ഞിന്റെ കണ്ണുകള്‍ക്ക് സാരമായ കേടുപാടുകള്‍ സംഭവിക്കുകയും ഇത് കാഴ്ചയെ ബാധിക്കുകയും ചെയ്തുവെന്നാണ് പിടിഐ റിപ്പോര്‍ട്ട് ചെയ്യുന്നത്.
കോലാറസ് പോലീസ് സ്റ്റേഷന്‍ പരിധിയിലാണ് സംഭവം നടന്നത്. മാര്‍ച്ച് 13 നാണ് സംഭവം. സുഖമില്ലാതിരുന്ന കുട്ടിയെ മാതാപിതാക്കള്‍ തന്നെയാണ് മന്ത്രവാദിയുടെ വീട്ടിലേക്ക് കൊണ്ടുപോയത്. മകനെ ചില ദുരാത്മാവുകള്‍ വേട്ടയാടുന്നുണ്ടെന്നും പരിഹാരം വേണമെന്നുമായിരുന്നു ആവശ്യം. മരുന്നുകൊണ്ട് ഒന്നും നടക്കില്ല ബാധയെ ഒഴിപ്പിക്കാന്‍ കുറച്ച് കടുത്ത ചികിത്സ വേണമെന്ന് മന്ത്രവാദി പറഞ്ഞു. തുടര്‍ന്ന് തീയുടെ മുകളില്‍ തലകീഴായി കെട്ടിത്തൂക്കി പൂജ നടത്തുകയായിരുന്നു.
പൂജ കഴിഞ്ഞപ്പോള്‍ കണ്ണിന് പരിക്ക് പറ്റിയതായി മാതാപിതാക്കളുടെ ശ്രദ്ധയില്‍പ്പെട്ടു. ശിവപുരി ജില്ലാ ആശുപത്രിയില്‍ പ്രവേശിച്ചപ്പോഴാണ് സംഭവം പുറംലോകം അറിയുന്നത്. ഉടന്‍ തന്നെ ആശുപത്രി അധികൃതര്‍ വിവരം പോലീസില്‍ അറിയിക്കുകയായിരുന്നു.
കുട്ടിയുടെ കണ്ണുകള്‍ക്ക് സാരമായ പരിക്ക് സംഭവിച്ചിട്ടുണ്ടെന്നും തീവ്രപരിചരണ വിഭാഗത്തില്‍ ചികിത്സയിലാണെന്നും ശിവപുരി ജില്ലാ ആശുപത്രിയിലെ നേത്രരോഗവിദഗ്ദ്ധന്‍ പറഞ്ഞു. 72 മണിക്കൂറിനു ശേഷമേ മാത്രമേ കാഴ്ചശക്തി തിരിച്ചു കിട്ടുമോ എന്ന് പറയാന്‍ സാധിക്കുകയുള്ളൂവെന്നാണ് ഡോക്ടര്‍ പറയുന്നതെന്ന് പിടിഐ റിപ്പോര്‍ട്ട് ചെയ്തു.
സംഭവത്തിന്റെ ഗൗരവം കണക്കിലെടുത്ത് പൊലീസ് മന്ത്രവാദിയായ രഘുവീര്‍ ധാക്കടിനെതിരേ കേസെടുത്തു. ഇയാള്‍ ഒളിവിലാണെന്നാണ് വിവരം. ഇയാളെ കൂടാതെ മാതാപിതാക്കള്‍ക്കെതിരേയും കേസെടുത്തിട്ടുണ്ടെന്നാണ് റിപ്പോര്‍ട്ടുകള്‍.
