കാസർകോട്: പതിനേഴുകാരിക്ക് നേരേ പിതാവിന്റെ ആസിഡ് ആക്രമണം. കാഞ്ഞങ്ങാട് കരിക്കയിലാണ് സംഭവം. കരിക്ക് സ്വദേശിയായ മനോജാണ് സ്വന്തം മകളെയും സഹോദരന്റെ പത്തുവയസുള്ള മകളെയും ആസിഡ് ആക്രമണത്തിന് ഇരയാക്കിയത്. സഹോദരന്റെ വീട്ടിലെത്തിയാണ് ഇയാൾ പെൺകുട്ടികൾക്ക് നേരേ ആസിഡ് ഒഴിച്ചത്. സംഭവത്തിന് പിന്നാലെ ഇയാൾ ഒളിവിൽ പോയി.
ഭാര്യയുമായി പിണങ്ങി കഴിയുകയായിരുന്നു മനോജ്. മകളും ഭാര്യയും സഹോദരന്റെ വീട്ടിൽ താമസിക്കുന്നതറിഞ്ഞാണ് അവിടെയെത്തിയാണ് ആക്രമണം നടത്തിയത്. ആസിഡ് ആക്രമണത്തിൽ മനോജിന്റെ മകൾക്ക് കൈക്കും കാലിനും ഗുരുതരമായി പൊള്ളലേറ്റു. ഒപ്പം ഉണ്ടായിരുന്ന സഹോദരന്റെ മകൾക്ക് മുഖത്തും കൈയിലും പൊള്ളലേറ്റിട്ടുണ്ട്. ഇരുവരെയും ഉടൻതന്നെ ആശുപത്രിയിൽ പ്രവേശിപ്പിച്ചു.
കർണാടക സ്വദേശിയാണ് മനോജ്. ആസിഡ് ആക്രമണത്തിന് പിന്നാലെ ഒളിവിൽ പോയ മനോജിനായി പൊലീസ് അന്വേഷണം വ്യാപിപ്പിച്ചു. കുടുംബ പ്രശ്നങ്ങളാണ് ആക്രമണത്തിന് പിന്നിലെന്നാണ് പൊലീസ് വ്യക്തമാക്കുന്നത്
