ഹൈദരാബാദ്: കാമുകന്റെ സഹായത്തോടെ സ്വന്തം അമ്മയെ കൊലപ്പെടുത്തി പതിനാറുകാരി. തെലങ്കാനയിലെ മെഡ്ചാൽ ജില്ലയിലാണ് സംഭവം. 39 വയസുള്ള അഞ്ജലിയാണ് സ്വന്തം മകളാൽ കൊല്ലപ്പെട്ടത്. യുവതിയെ മകളും കാമുകനും ഇയാളുടെ സഹോദരനും ചേർന്ന് കഴുത്ത്ഞെരിച്ച് കൊലപ്പെടുത്തുകയായിരുന്നു. മൂന്നു പ്രതികളെയും പൊലീസ് അറസ്റ്റ് ചെയ്തിട്ടുണ്ട്.
അഞ്ജലിയുടെ മകളും കാമുകൻ പഗില്ല ശിവ (19)യും ഇയാളുടെ സഹോദരൻ പഗില്ല യശ്വന്തും(18) ആണ് അറസ്റ്റിലായത്. ഇവർ മൂന്നു പേരും ചേർന്നാണ് കൊലപാതകം ആസൂത്രണം ചെയ്തതെന്ന് പൊലീസ് അറിയിച്ചു. മൂവരും ചേർന്ന് അഞ്ജലിയെ കഴുത്ത് ഞെരിച്ച് കൊലപ്പെടുത്തിയ ശേഷം ഇരുമ്പ് ദണ്ഡ് ഉപയോഗിച്ച് തലയ്ക്കും മുഖത്തും അടിച്ചതായാണ് വിവരം. മുഖത്ത് അടിയേറ്റതിന്റെ പാടുകളുണ്ടെന്ന് അഞ്ജലിയുടെ സഹോദരി അറിയിച്ചു.
ഒരാഴ്ച മുൻ‌പ് പെൺകുട്ടി കാമുകൻ പഗില്ല ശിവയ്ക്കൊപ്പം ഒളിച്ചോടിയിരുന്നു. തുടർന്ന് അഞ്ജലി പൊലീസിൽ പരാതി നൽകി. പൊലീസ് അനവേഷണം ആരംഭിച്ചതോടെ മൂന്നു ദിവസത്തിനു ശേഷം പെൺകുട്ടി വീട്ടിൽ തിരിച്ചെത്തി. എന്നാൽ തങ്ങളുടെ ബന്ധം എതിർത്ത അമ്മയോട് പെൺകുട്ടിക്കും കാമുകനും പകയായി. ഇതിന് പ്രതികാരം ചെയ്യാനാണ് പെൺകുട്ടി കാമുകനുമായി ചേർന്ന് അമ്മയെ ഇല്ലാതാക്കാൻ പദ്ധതിയിട്ടതെന്നാണ് പൊലീസ് പറയുന്നത്. സംഭവത്തിൽ മൂന്നു പേരെയും പൊലീസ് അറസ്റ്റ് ചെയ്തു. പോസ്റ്റ്മോർട്ടം റിപ്പോർട്ട് ലഭിച്ചതിനു ശേഷമേ കൂടുതൽ കാര്യങ്ങൾ അറിയാൻ സാധിക്കൂ എന്ന് പൊലീസ് അറിയിച്ചു.
