തിരുവനന്തപുരം:തലസ്ഥാന നഗരിക്ക് ശാസ്ത്ര വിസ്മയങ്ങളുടെ പുതിയ കാഴ്ചകളൊരുക്കി 55ാമത് സംസ്ഥാന സ്കൂൾ ശാസ്ത്രോത്സവം രണ്ട് ദിനങ്ങൾ പിന്നിടുമ്പോൾ മലപ്പുറം ജില്ലയുടെ മുന്നേറ്റം. 311 പോയന്‍റുമായാണ് മലപ്പുറം കുതിപ്പ് തുടരുന്നത്. കോഴിക്കോടും (302), തൃശൂരും (298) ആണ് രണ്ടും മൂന്നും സ്ഥാനങ്ങളിൽ. ആതിഥേയരായ തിരുവനന്തപുരം അഞ്ചാം സ്ഥാനത്താണ്. 50 ഇനങ്ങളില്‍ വെള്ളിയാഴ്ച മത്സരങ്ങള്‍ പൂർത്തിയായി. സ്കൂൾ തലത്തിൽ 52 പോയൻറുമായി വയനാട് മാനന്തവാടി ഗവ. വി.എച്ച്.എസ്.എസാണ് മുന്നിൽ.
50 പോയൻറുമായി പാലക്കാട് വാണിയാംകുളം ടി.ആർ.കെ എച്ച്.എസ്.എസാണ് തൊട്ടുപിന്നിൽ. 48 പോയൻറുമായി ആലപ്പുഴ പൂങ്കവ് എം.ഐ.എച്ച്.എസും 46 പോയൻറുമായി കോഴിക്കോട് മേമുണ്ട എച്ച്.എസ്.എസും പിന്നാലെയുണ്ട്. സ്പെഷൽ സ്കൂൾ പ്രവൃത്തി പരിചയമേള, ശാസ്ത്ര, സാമൂഹിക ശാസ്ത്രം, ഗണിതശാസ്ത്രം, സ്റ്റിൽ, വർക്കിങ് മോഡൽ, ഐ.ടി മേള വിഭാഗങ്ങളിലാണ് വെള്ളിയാഴ്ച മത്സരം നടന്നത്. ശനിയാഴ്ച ഇതേ വിഭാഗത്തിൽ ഹയർ സെക്കൻഡറി മത്സരങ്ങൾ നടക്കും. ശാസ്ത്രോത്സവത്തിന് ഞായറാഴ്ച കൊടിയിറങ്ങും.
