ദിവസവും നടത്തം ശീലമാക്കുന്നതിലൂടെ കാൻസറിനെ പ്രതിരോധിക്കാനാവുമെന്ന് പഠനം



    ശാരീരികാരോഗ്യം നിലനിർത്തുന്നതിൽ നടത്തത്തിന്റെ പങ്ക് വളരെ വലുതാണ്. നടത്തം ശീലമാക്കുന്നതിലൂടെ ജീവിതശൈലീരോഗങ്ങളേയും അകാലമരണത്തേയും വിഷാദരോഗത്തേയുമൊക്കെ പ്രതിരോധിക്കാനാവുമെന്ന് പലപഠനങ്ങളും തെളിയിച്ചിട്ടുണ്ട്. ഇപ്പോഴിതാ നടത്തവും കാൻസറും തമ്മിലുള്ള ബന്ധം വ്യക്തമാക്കുന്നൊരു പഠനമാണ് പുറത്തുവന്നിരിക്കുന്നത്. നടത്തം ശീലമാക്കുന്നതിലൂടെ കാൻസറിനെ പ്രതിരോധിക്കാനാവുമെന്നാണ് പഠനത്തിൽ കണ്ടെത്തിയത്.

ഓക്സ്ഫ‍ഡ് സർവകലാശാലയിലെ ഗവേഷകരാണ് പഠനം നടത്തിയത്. ദിവസവും നടക്കുന്നതിലൂടെ പതിമൂന്നിനം കാൻസറുകളുടെ സാധ്യത കുറയ്ക്കുമെന്നാണ് പഠനത്തിൽ കണ്ടെത്തിയത്. യു.കെ.യിലെ 85,000 പേരുടെ ആരോഗ്യവിവരങ്ങൾ ശേഖരിച്ചാണ് പഠനം നടത്തിയത്. ആറുവർഷത്തോളം പഠനത്തിൽ പങ്കാളികളായവരെ നിരീക്ഷിച്ചതിനുശേഷമാണ് വിലയിരുത്തലിലെത്തിയത്.

എത്രത്തോളം നടക്കുന്നോ, അത്രത്തോളം കാൻസർ സാധ്യതയും കുറയുമെന്നാണ് ഗവേഷകർ വ്യക്തമാക്കുന്നത്. ദിവസവും കുറഞ്ഞത് അയ്യായിരം ചുവടെങ്കിലും നടക്കുന്നവരിലാണ് ഗുണം ലഭിക്കുക. ഏഴായിരം ചുവടുകൾ നടക്കുന്നതിലൂടെ കാൻസർ സാധ്യത പതിനൊന്ന് ശതമാനമായും 9000 ചുവടുകൾ നടക്കുന്നതിലൂടെ പതിനാറ് ശതമാനമായും കുറയ്ക്കാമെന്ന് ഗവേഷകർ പറയുന്നു. 9000-ൽ കൂടുതൽ ചുവടുകൾ നടക്കുന്നത് വീണ്ടും ആരോഗ്യം മെച്ചപ്പെടുത്താൻ സഹായിക്കുമെന്നും ഗവേഷകർ പറയുന്നു. നടക്കുന്നത് എത്ര തീവ്രമായാണ് എന്നതിലല്ല, ശരീരത്തിന് ആവശ്യമായത്ര നടക്കുന്നുവെന്നതാണ് ഉറപ്പാക്കേണ്ടതെന്നാണ് ഗവേഷകർ പറയുന്നത്.

കൂടാതെ ദീർഘസമയം ഇരിക്കുന്നതിന് പകരം മിതമായ ശാരീരിക പ്രവർത്തനങ്ങളിൽ ഏർപ്പെടുന്നതും കാൻസറിനെ പ്രതിരോധിക്കാൻ സഹായിക്കുമെന്ന് ഗവേഷകർ പറയുന്നു. കരൾ, ശ്വാസകോശം, വൃക്ക, എൻഡോമെട്രിയൽ, കുടൽ, ഹെ‍ഡ്&നെക്ക്, മൂത്രാശയം, സ്തനം തുടങ്ങിയ കാൻസറുകളെ പ്രതിരോധിക്കുന്നതിലാണ് നടത്തത്തിന്റെ പങ്കിനേക്കുറിച്ച് ഗവേഷകർ പഠനം നടത്തിയത്.

ദിവസവും കുറഞ്ഞത് പതിനായിരം ചുവടെങ്കിലും വെക്കുന്നത് ശരീരത്തിന്റെ മൊത്തത്തിലുള്ള ആരോഗ്യത്തിന് ഗുണകരമാണെന്നാണ് ഇതുവരെ പറഞ്ഞിരുന്നതെങ്കിൽ ഇനി കാൻസർ പ്രതിരോധത്തിനും കൂടി ഗുണംചെയ്യുമെന്നാണ് ഗവേഷകർ കൂട്ടിച്ചേർക്കുന്നത്.

*നടത്തം ശീലമാക്കാൻ ചില ടിപ്സ്*

🔹രണ്ടുനില കെട്ടിടം കയറുമ്പോഴെങ്കിലും ലിഫ്റ്റ് ഒഴിവാക്കി നടക്കാൻ ശീലിക്കുക.

🔹ഓരോ മണിക്കൂറിലും ഇടവേളയെടുത്ത് അൽപം നടന്നുവരാം.

🔹ഫോൺകോൾ വരുമ്പോൾ നടന്ന് സംസാരിക്കുന്നത് ശീലമാക്കാം.

🔹വലിയ കുപ്പികളിൽ വെള്ളം നിറയ്ക്കുന്നതിനു പകരം ചെറിയ കുപ്പികളെടുക്കാം. അപ്പോൾ ഇടയ്ക്കിടെ വെള്ളം നിറയ്ക്കാനായി നടക്കാം.

Leave a Reply

You cannot copy content of this page

Social media & sharing icons powered by UltimatelySocial
%d bloggers like this: