തിരുവനന്തപുരം: യൂത്ത് കോൺഗ്രസ് സംസ്ഥാന പ്രസിഡൻ്റെ രാഹുൽ മാങ്കൂട്ടത്തിലിന്റെ്റെ അറസ്റ്റിൽ പ്രതിഷേധിച്ച് യൂത്ത് കോൺഗ്രസ് പ്രതിഷേധം. ക്ലിഫ് ഹൗസിലേക്ക് നൈറ്റ് മാർച്ചാണ് സംഘടിപ്പിച്ചത്. പന്തംകൊളുത്തിയായിരുന്നു പ്രതിഷേധം. വിടി ബൽറാമിന്റെ നേതൃത്വത്തിലാണ് മാർച്ച് സംഘടിപ്പിച്ചത്.
രാഹുൽ മാങ്കൂട്ടത്തിലിനെ പിന്തുണച്ചുകൊണ്ടുള്ള മുന്ദ്രാവാക്യത്തോടെയായിരുന്നു മാർച്ച്. ക്ലിഫ് ഹൗസിന് മുന്നിൽ കനത്ത സുരക്ഷയാണ് പൊലീസ് ഒരുക്കിയിരിക്കുന്നത്. ക്ലിഫ് ഹൗസിന് മുന്നിൽ വച്ച് പൊലീസ് മാർച്ച് ബാരിക്കേഡ് വച്ച് തടയുകയായിരുന്നു. തുടർന്ന് കയ്യിലിരിക്കുന്ന തീപ്പന്തങ്ങൾ പൊലീസിനു നേർക്ക് എറിഞ്ഞെങ്കിലും നേതാക്കൾ അത് തടയുകയായിരുന്നു. ഇതോടെ തീപ്പന്തങ്ങൾ കൂട്ടിയിട്ട് യൂത്ത് കോൺഗ്രസ് പ്രവർത്തകർ കത്തിച്ചു. ക്ലിഫ് ഹൗസ് പരിസരത്തെ ഫ്ളക്സ് ബോർഡുകൾ പ്രവർത്തകർ തകർത്തു.സെക്രട്ടേറിയറ്റ് മാർച്ചിലെ സംഘർഷവുമായി ബന്ധപ്പെട്ടാണ് യൂത്ത് കോൺഗ്രസ് സംസ്ഥാന പ്രസിഡന്റ് രാഹുൽ മാങ്കൂട്ടത്തിലിനെ ചൊവ്വാഴ്ച പുലർച്ചെ പൊലീസ് അറസ്റ്റ് ചെയ്തത്‌.
