തിരുവനന്തപുരം: സഹകരണ സ്ഥാപനങ്ങളിലെ വർഷങ്ങളായി ഉപയോഗിക്കാതെ കിടക്കുന്ന അക്കൗണ്ടുകളുമായി ബന്ധപ്പെട്ട് സുപ്രധാന തീരുമാനവുമായി സഹകരണ വകുപ്പ്. 10 വർഷമായി നിഷ്ക്രിയമായി കിടക്കുന്ന അക്കൗണ്ടുകളിലെ തുക സഹകരണ നിക്ഷേപ ഗാരന്റി ഫണ്ട് ബോർഡിലേക്ക് കൈമാറാനാണ് പുതിയ നിർദേശം. റിസർവ് ബാങ്ക് പിന്തുടരുന്ന മാതൃകയിലാണ് ഈ നടപടി നടപ്പാക്കുന്നത്.
10 വർഷം അനങ്ങാത്ത അക്കൗണ്ടുകൾ കണ്ടെത്തണം
സഹകരണ ബാങ്കുകളും മറ്റ് സഹകരണ സ്ഥാപനങ്ങളും 10 വർഷമായി ഇടപാടുകളൊന്നുമില്ലാത്ത അക്കൗണ്ടുകൾ കണ്ടെത്തണമെന്നാണ് നിർദേശം. ഇത്തരം അക്കൗണ്ടുകളിലെ നിക്ഷേപത്തുക മൂന്ന് മാസത്തിനകം സഹകരണ നിക്ഷേപ ഗാരന്റി ഫണ്ട് ബോർഡിന് കൈമാറണം.
ഉടമ എത്തിയാൽ പണം ലഭിക്കും
അക്കൗണ്ടിലെ തുക ബോർഡിലേക്ക് മാറ്റിയ ശേഷവും അക്കൗണ്ട് ഉടമയ്ക്കോ നിയമപരമായ അവകാശിക്കോ പണം നഷ്ടമാകില്ല. പിന്നീട് തുകയ്ക്കായി ഉടമ എത്തിയാൽ ബന്ധപ്പെട്ട സഹകരണ സ്ഥാപനം തന്നെ പണം നൽകണം. തുടർന്ന് നൽകിയ തുക ബോർഡിൽ നിന്ന് സ്ഥാപനം തിരിച്ചുപറ്റാനും വ്യവസ്ഥയുണ്ട്.
നിക്ഷേപകരുടെ സുരക്ഷയ്ക്കുള്ള ഗാരന്റി ഫണ്ട്
സഹകരണ സംഘങ്ങൾ സാമ്പത്തിക പ്രതിസന്ധിയിലാകുകയോ തകരുകയോ ചെയ്താൽ നിക്ഷേപകർക്ക് നഷ്ടപരിഹാരം നൽകുന്നതിനായാണ് സഹകരണ നിക്ഷേപ ഗാരന്റി ഫണ്ട് ബോർഡ് രൂപീകരിച്ചിരിക്കുന്നത്. നിലവിലെ വ്യവസ്ഥ പ്രകാരം നിക്ഷേപകർക്ക് പരമാവധി അഞ്ച് ലക്ഷം രൂപവരെ നഷ്ടപരിഹാരം ലഭിക്കും.
അംഗത്വത്തിന് പുതിയ വ്യവസ്ഥകൾ
ഗാരന്റി ഫണ്ട് ബോർഡിൽ എല്ലാ സഹകരണ സംഘങ്ങളും അംഗങ്ങളാകണമെന്നതാണ് നിലവിലെ നിബന്ധന. മുമ്പ് മൊത്തം നിക്ഷേപത്തിന്റെ 0.02 ശതമാനം ഗാരന്റി തുകയായി അടച്ചാൽ മതിയായിരുന്നു. എന്നാൽ പുതിയ സംവിധാനത്തിൽ നിലവിൽ അംഗങ്ങളായ സംഘങ്ങൾ ഓരോ വർഷവും അധികമായി ലഭിക്കുന്ന നിക്ഷേപത്തിന്റെ 0.12 ശതമാനം നൽകണം.
അതേസമയം, പുതുതായി അംഗങ്ങളാകുന്ന സംഘങ്ങൾ മൊത്തം നിക്ഷേപത്തുകയുടെ 0.10 ശതമാനം ഗാരന്റി തുകയായി അടയ്ക്കേണ്ടതുണ്ട്.
ഗാരന്റി സ്കീമിൽ അംഗത്വം നേടിയ സഹകരണ സംഘങ്ങളുടെ പട്ടിക പൊതുജനങ്ങൾക്കായി പ്രസിദ്ധീകരിക്കാനാണ് സഹകരണ വകുപ്പിന്റെ ആലോചന. എന്നാൽ ഈ തീരുമാനത്തിനെതിരെ വിമർശനങ്ങളും ഉയരുന്നുണ്ട്.
തിരുവനന്തപുരം ജില്ലയിൽ മാത്രം 46 സംഘങ്ങളാണ് ഇതുവരെ ഗാരന്റി സ്കീമിൽ അംഗങ്ങളായിട്ടുള്ളത്. മറ്റു ജില്ലകളിലും നിരവധി സ്ഥാപനങ്ങൾ ഇനിയും പദ്ധതിയിൽ ചേരാനുണ്ട്.
ഗാരന്റി സ്കീമിൽ ചേരാത്ത സ്ഥാപനങ്ങളുടെ വിവരങ്ങൾ പുറത്തുവന്നാൽ നിക്ഷേപകർ ആശങ്കപ്പെടുകയും വലിയ തോതിൽ പണം പിൻവലിക്കാനുള്ള സാധ്യതയുണ്ടെന്നുമാണ് വിമർശകർ ചൂണ്ടിക്കാട്ടുന്നത്. സ്കീമിൽ അംഗത്വമെടുക്കുന്നതിന് തടസ്സമായ സാങ്കേതികവും ഭരണപരവുമായ പ്രശ്നങ്ങൾ ആദ്യം പരിഹരിക്കണമെന്ന ആവശ്യവും ശക്തമാണ്.
ഗാരന്റി ഫണ്ട് ബോർഡിന്റെ സോഫ്റ്റ്വെയറുമായി ബന്ധപ്പെട്ട സാങ്കേതിക തകരാറുകൾ നിലനിൽക്കുന്നതിനാൽ സഹകരണ സംഘങ്ങൾക്ക് പദ്ധതിയിൽ ചേരാനുള്ള സമയപരിധി ഓഗസ്റ്റ് 31 വരെ ദീർഘിപ്പിച്ചിട്ടുണ്ട്
