പത്തനംതിട്ട: തിരുവല്ല കെ എസ് ആർ ടി സി ബസ് സ്റ്റാൻഡിൽ നിന്ന് ബസ് കടത്തിക്കൊണ്ടുപോകാൻ ശ്രമം. സംഭവത്തിൽ ഒരാളെ അറസ്റ്റ് ചെയ്തു. ആഞ്ഞിലിത്താനം വീട്ടിൽ ജെബിൻ ആണ് പോലീസിൻ്റെ പിടിയിലായത്. ഇന്നലെ രാത്രി പത്തരയോടെയാണ് സംഭവം. ബസ് സ്റ്റാർട്ട് ആക്കി കൊണ്ടുപോകാൻ ശ്രമിക്കുകയായിരുന്നു. എന്നാൽ ജീവനക്കാരും യാത്രക്കാരും ചേർന്ന് തടയുകയായിരുന്നു. ഇയാൾ മദ്യലഹരിയിലായിരുന്നു.
ഇയാൾ നിർത്തിയിരുന്ന മല്ലപ്പള്ളി റൂട്ടിലോടുന്ന ബസിൽ കയറി, ബസ് മുന്നോട്ടെടുത്തു. തുടർന്ന് കെ എസ് ആർ ടി സി ജീവനക്കാരും ചേർന്ന് പിടിച്ചിറക്കുകയായിരുന്നു.അതോടെ പോലീസിൽ വിവരമറിയിച്ചു. സംഭവത്തിൻ്റെ ദൃശ്യങ്ങൾ പുറത്തുവന്നിട്ടുണ്ട്. ഡ്രൈവർ സീറ്റിൽ നിന്ന് ഇറക്കാൻ ശ്രമിക്കുമ്പോൾ ‘ഒന്നും പേടിക്കേണ്ട ഞാൻ ഓടിച്ചോളാം’ എന്നൊക്കെ ഇയാൾ പറയുന്നുണ്ട്. ബസ് കടത്തിക്കൊണ്ടുപോകാൻ ശ്രമിച്ചതിന് പ്രതിയെ റിമാൻഡ് ചെയ്യുമെന്നും പൊലീസ് അറിയിച്ചു.
