മഴ കനക്കുന്നു; തിരുവനന്തപുരത്ത് ടൂറിസം കേന്ദ്രങ്ങള് അടച്ചു
തിരുവനന്തപുരം: തലസ്ഥാനത്ത് മഴ കനത്തതോടെ ഇക്കോ ടൂറിസം കേന്ദ്രങ്ങള് അടച്ചു. മഴ സാഹചര്യം കണക്കിലെടുത്ത് പൊന്മുടി, കല്ലാര്, മങ്കയം ഇക്കോ ടൂറിസം കേന്ദ്രങ്ങളാണ് താല്ക്കാലികമായി അടച്ചത്. തിരുവനന്തപുരത്ത് മഴ തുടരുന്നതിനാല് ജില്ലയില് ഓറഞ്ച് അലര്ട്ട് പ്രഖ്യാപിച്ചിരിക്കുകയാണ്. ഈ സാഹചര്യത്തിലാണ് മുന്കരുതല് നടപടിയായി ടൂറിസം കേന്ദ്രങ്ങള് അടച്ചത്. തിരുവനന്തപുരത്തിന് പുറമെ, കൊല്ലം പത്തനംതിട്ട ജില്ലകളിലും തീവ്രമഴ മുന്നറിയിപ്പാണ് പുറപ്പെടുവിച്ചിട്ടുള്ളത്. ബംഗാള് ഉള്ക്കടലില് തെക്കന് ശ്രീലങ്കന് തീരത്തോട് ചേര്ന്ന് സ്ഥിതി ചെയ്യുന്ന ചക്രവാതചുഴിയുടെ സ്വാധീനഫലമായാണ് മഴ ശക്തമായത്.
