അതിരപ്പിള്ളിയിൽ കാട്ടാന ആക്രമണത്തിൽ യുവാവ് കൊല്ലപ്പെട്ടു
തൃശൂര്: അതിരപ്പിള്ളി മലക്കപ്പാറ അടിച്ചില്തോട്ടിയില് കാട്ടാനയുടെ ആക്രമണത്തില് 20 കാരന് കൊല്ലപ്പെട്ടു. തമ്പാന്റെ മകന് സെബാസ്റ്റ്യന് ആണ് കൊല്ലപ്പെട്ടത്. ഇന്നലെ രാത്രിയാണ് സംഭവം. കാട്ടിലേക്ക് തേന് എടുക്കാന് സുഹൃത്തിനൊപ്പം പോയപ്പോഴാണ് അപകടത്തില്പ്പെട്ടത്. ഒപ്പമുണ്ടായിരുന്നയാള് തലനാരിഴയ്ക്ക് രക്ഷപ്പെട്ടു. ഉടന് തന്നെ ആശുപത്രിയിലെത്തിച്ചെങ്കിലും ജീവന് രക്ഷിക്കാനായില്ല. യുവാവിന്റെ മൃതദേഹം ചാലക്കുടി താലൂക്ക് ആശുപത്രിയില് സൂക്ഷിച്ചിരിക്കുകയാണ്. മൃതദേഹം പോസ്റ്റുമോര്ട്ടത്തിന് ശേഷം ബന്ധുക്കള്ക്ക് വിട്ടുനല്കും. സംസ്ഥാനത്ത് കാട്ടാന ആക്രമണം വ്യാപകമാണ്. കഴിഞ്ഞയാഴ്ച്ച പാലക്കാടും യുവാവ് കാട്ടാനയുടെ ആക്രമത്തില് മരിച്ചിരുന്നു. യുവാവിന്റെ അമ്മയ്ക്കും പരിക്കേറ്റിരുന്നു.
