പുനലൂർ: ന്യൂസീലൻഡിൽ ജോലി നൽകാമെന്ന് പറഞ്ഞ് വിശ്വസിപ്പിച്ച് ലക്ഷങ്ങൾ തട്ടിയ പ്രതിയെ പോലീസ് പിടികൂടി. 11.3 ലക്ഷം രൂപയാണ് പ്രതി പരാതിക്കാരനിൽ നിന്ന് തട്ടിയത്. എറണാകുളം കുറുപ്പംപടി രായമംഗലം അട്ടയത്ത് ഹൗസിൽ ബിനിൽ കുമാർ (41) ആണ് അറസ്റ്റിലായത്. പിറവന്തൂർ കറവൂർ ചരുവിള പുത്തൻ വീട്ടിൽ ജി. നിഷാദ് എന്നയാളാണ് തട്ടിപ്പിനിരയായത്. 45 ദിവസത്തിനുള്ളിൽ ന്യൂസീലൻഡിൽ കൊണ്ടുപോയി ജോലി വാങ്ങി നൽകുമെന്നുള്ള സമൂഹ മാധ്യമത്തിൽ നൽകിയ പരസ്യം കണ്ടാണ് പരാതിക്കാരൻ ബിന്നിൽ കുമാറിനെ ബന്ധപ്പെടുന്നത്.
നിഷാദിൽ നിന്ന് പ്രതി വീസ, സർവീസ് ചാർജ് എന്നീ വകയിൽ 11.5 ലക്ഷം രൂപ വാങ്ങി. 2 തവണകളായാണ് നിഷാദ് ഇയാൾക്ക് പണം നൽകിയത്. ഇതേതുടർന്ന് പ്രതി പരാതിക്കാരന് ഓഫർ ലെറ്റർ നൽകുകയും ചെയ്തു. എന്നാൽ മാസങ്ങൾ പിന്നിട്ടിട്ടും വിസ ലഭിക്കാതിരുന്നതോടെയാണ് നടന്നത് തട്ടിപ്പാണെന്ന് മനസിലായത്. ഇതോടെ നിഷാദ് പോലീസിൽ പരാതി നൽകുകയായിരുന്നു. തട്ടിപ്പിൽ മറ്റാർക്കെങ്കിലും പങ്കുണ്ടോ എന്നത് സംബന്ധിച്ച അന്വേഷണം നടക്കുന്നുണ്ടെന്ന് പുനലൂർ എസ്എച്ച്ഒ ടി.രാജേഷ്കുമാർ അറിയിച്ചു.
