ഇടുക്കി: തൊടുപുഴയിൽ വീട്ടിൽ കഞ്ചാവ് കൃഷി ചെയ്തിരുന്നയാൾ പിടിയിലായി. എക്സൈസ് സംഘമാണ് ഇയാളെ പിടികൂടിയത്. നേർച്ചപ്പാറ സ്വദേശി വിനോദാണ് പിടിയിലായത്. ഇയാളുടെ വീട്ടുമുറ്റത്ത് വളർത്തിയിരുന്ന 80 കഞ്ചാവ് ചെടികളും കണ്ടെത്തിയിട്ടുണ്ട്. ഇതുകൂടാതെ ഇയാളുടെ വീട്ടിനുള്ളിൽ നിന്ന് 2.07 കിലോഗ്രാം ഉണക്ക കഞ്ചാവ്, മൂന്ന് ഗ്രാം ചരസും, 155 ഗ്രാം കഞ്ചാവ് വിത്തുകളും എക്സൈസ് സംഘം കണ്ടെടുത്തു.
ഇടുക്കി സ്പെഷ്യൽ സ്‌ക്വാഡ് സർക്കിൾ ഇൻസ്‌പെക്ടർ ആർ.പി.മിഥിൻ ലാലിൻ്റെ നേതൃത്വത്തിൽ പരിശോധന നടന്നു. എക്സൈസ് ഇൻസ്‌പെക്ടർ വിജയകുമാർ, അസിസ്റ്റൻ്റ് എക്സൈസ് ഇൻസ്‌പെക്ടർ നെബു, സൈബർ സെല്ലിലെ സിവിൽ എക്സൈസ് ഓഫീസർ അനൂപ്.പി.ജോസഫ്, സിവിൽ എക്സൈസ് ഓഫീസർ ആനന്ദു, വനിത സിവിൽ എക്സൈസ് സിന്ധു, സിവിൽ എക്സൈസ് ഓഫീസർ ഡ്രൈവർ ശശി.പി.കെ തുടങ്ങിയവരും പരിശോധനയുടെ ഭാഗമായിരുന്നു.
