തിരുവനന്തപുരം: 2023–24 രഞ്ജി ട്രോഫി മത്സരത്തിൽ കേരളത്തെ നയിക്കുന്നത് ഇന്ത്യൻ താരം സഞ്ജു സാംസൺ. ആദ്യ രണ്ടു മത്സരങ്ങൾക്കുള്ള കേരള ടീമിനെയും പ്രഖ്യാപിച്ചു. ജനുവരി അഞ്ചു മുതൽ നടക്കുന്ന മത്സരങ്ങളിൽ ആലപ്പുഴയിലും ഗുവാഹത്തിയിലുമാണു . കേരള ടീമിന്റെ ആദ്യത്തെ രണ്ടു കളികൾ.
ഇന്ത്യൻ താരം സഞ്ജു സാംസൺ നയിക്കുന്ന ടീമിൽ യുവ താരം രോഹൻ എസ്. കുന്നുമ്മലാണു വൈസ് ക്യാപ്റ്റൻ. എം. വെങ്കടരമണയാണു കേരളത്തിന്റെ പരിശീലകൻ. സച്ചിൻ ബേബി, രോഹൻ പ്രേം, ജലജ് സക്സേന, ശ്രേയസ് ഗോപാൽ തുടങ്ങി പ്രമുഖ താരങ്ങളെല്ലാം 16 അംഗ ടീമിൽ ഇടം പിടിച്ചു.
ഉത്തർ പ്രദേശിനെതിരെയാണ് കേരളത്തിന്റെ ആദ്യ മത്സരം. ജനുവരി 12ന് അസമിനെതിരെയാണ് കേരളത്തിന്റെ രണ്ടാം പോരാട്ടം. എലൈറ്റ് ഗ്രൂപ്പ് ബിയിലാണ് കേരളം കളിക്കുന്നത്. ബംഗാൾ, ആന്ധ്രപ്രദേശ്, മുംബൈ, ഛത്തീസ്ഗഡ്, ഉത്തർപ്രദേശ്, ബിഹാർ ടീമുകളും ബി ഗ്രൂപ്പിലുണ്ട്.
രഞ്ജി ട്രോഫിക്കുള്ള കേരള ടീം: സഞ്ജു വിശ്വനാഥ് സാംസൺ (ക്യാപ്റ്റൻ), രോഹൻ എസ്. കുന്നുമ്മൽ (വൈസ് ക്യാപ്റ്റൻ), കൃഷ്ണ പ്ര‌സാദ്, ആനന്ദ് കൃഷ്ണൻ, രോഹൻ പ്രേം, സച്ചിൻ ബേബി, വിഷ്ണു വിനോദ്, അക്ഷയ് ചന്ദ്രൻ, ശ്രേയസ് ഗോപാൽ, ജലജ് സക്സേന, വൈശാഖ് ചന്ദ്രൻ, ബേസിൽ തമ്പി, വിശ്വേശ്വർ എ. സുരേഷ്, നിധീഷ് എം.ഡി, ബേസിൽ എന്‍.പി, വിഷ്ണു രാജ്.
