തൃശ്ശൂർ : പാലിയേക്കര ടോൾ പ്ലാസയിൽ വാഹനങ്ങൾ നിയന്ത്രിക്കുന്നതിനിടെ ടോൾ കമ്പനി ജീവനക്കാരൻ ലോറിയിടിച്ച് മരിച്ചു. ആളൂർ താണിപ്പാറ സ്വദേശി പാട്ടത്ത് വീട്ടിൽ മണികണ്ഠൻ (58) ആണ് മരിച്ചത്. ഇന്നലെ വൈകീട്ട് ആറരയോടെയായിരുന്നു അപകടം. സംഭവത്തിൽ ഹരിയാന സ്വദേശിയായ ട്രെയിലർ ഡ്രൈവർക്കെതിരെ പോലീസ് കേസെടുത്തു.
തൃശ്ശൂർ ഭാഗത്തേക്കുള്ള നാലാമത്തെ ടോൾ ബൂത്തിലായിരുന്നു അപകടം. ഫാസ്ടാഗിൽ പണമില്ലാത്തതിനെ തുടർന്ന് ഒരു ടോറസ് ലോറി ട്രാക്കിൽ കുടുങ്ങിയിരുന്നു. ഈ ലോറിയെ ട്രാക്കിൽ നിന്ന് മാറ്റുന്നതിനായി തൊട്ടുപിന്നിലുണ്ടായിരുന്ന ട്രെയിലർ ലോറി വേഗത്തിൽ പിന്നോട്ടെടുത്തു. ഈ സമയം ട്രാക്കിൽ വാഹനങ്ങൾ നിയന്ത്രിക്കുകയായിരുന്ന മണികണ്ഠൻ പിന്നിൽ നിന്ന് ലോറി വരുന്നത് ശ്രദ്ധിച്ചില്ല.
നിയന്ത്രണം വിട്ട ട്രെയിലർ മണികണ്ഠനെ ഇടിച്ച് വീഴ്ത്തുകയും ദേഹത്തുകൂടി ചക്രങ്ങൾ കയറിയിറങ്ങുകയുമായിരുന്നു. ഉടൻ തന്നെ തൃശ്ശൂരിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. അശ്രദ്ധമായി വാഹനമോടിച്ച് അപകടമുണ്ടാക്കിയതിനാണ് ഡ്രൈവർക്കെതിരെ കേസെടുത്തിരിക്കുന്നത്.
