മുംബൈ: പ്രായപൂർത്തിയാകാത്ത പെൺകുട്ടിയെ പീഡിപ്പിച്ച കേസിൽ പരോളിൽ ഇറങ്ങിയ കൊലക്കേസ് പ്രതി അറസ്റ്റിൽ. സഞ്ജയ് പ്രകാശ് മാനെ(34) ആണ് പ്രതി. പെൺകുട്ടിയെ പ്രതി തന്റെ വീട്ടിലേക്ക് നിർബന്ധിച്ച് കൂട്ടികൊണ്ടുപോയി പീഡിപ്പിക്കുകയായിരുന്നു. മഹാരാഷ്ട്രയിലെ സാംഗ്ലിയിലാണ് സംഭവം.
2011ലെ കൊലപാതകക്കേസിലെ പ്രതിയാണ് മാനെ. രണ്ട് മാസം മുമ്പാണ് ഇയാൾ പരോളിൽ പുറത്തിറങ്ങിയത്. വെള്ളിയാഴ്ച രാത്രി 9.30ഓടെ കടയിലേക്ക് പോകാനായി ഇറങ്ങിയ പെൺകുട്ടിയെ ബലമായി തന്റെ വീട്ടിലേക്ക് കൊണ്ടുപോയി ബലാത്സംഗം ചെയ്യുകയുമായിരുന്നുവെന്ന് പൊലീസ് അറിയിച്ചു. പീഡനവിവരം പെൺകുട്ടി അമ്മയെ അറിയിച്ചതിനെ തുടർന്നാണ് പൊലീസിൽ പരാതി നൽകിയത്.
രണ്ട് മണിക്കൂറിനുള്ളിൽ പ്രതിയെ പിടികൂടുകയും ചെയ്തു. കഴിഞ്ഞ മാസവും ഇയാൾ പെൺകുട്ടിയെ പീഡിപ്പിച്ചിരുന്നതായി കുട്ടിയുടെ അമ്മ മൊഴി നൽകി. പോക്‌സോ പ്രകാരമാണ് പ്രതിക്കെതിരെ കേസെടുത്തിരിക്കുന്നത്.
