തിരുവനന്തപുരം: കനത്ത മഴയിലും കാറ്റിലും വഴിയിൽ വീണുകിടന്നിരുന്ന പോസ്റ്റിൽ നിന്ന് ഷോക്കേറ്റ് ബൈക്ക് യാത്രികനായ 19 കാരന് ദാരുണാന്ത്യം. തിരുവനന്തപുരം നെടുമങ്ങാട് ആണ് ഞായറാഴ്ച പുലര്‍ച്ചെ രണ്ടുമണിയോടെ അപകടം നടന്നത്. പനയമുട്ടം സ്വദേശി അക്ഷയ് ആണ് മരിച്ചത്.
കാറ്ററിങിന് പോയി മടങ്ങി വരുന്ന സമയത്താണ് അപകടം നടന്നത്. മൂന്ന് പേരായിരുന്നു ബൈക്കിലുണ്ടായിരുന്നത്. അക്ഷയ് ആണ് ബൈക്ക് ഓടിച്ചതെന്ന് പൊലീസ് പറയുന്നു. ഇന്നലെ പെയ്ത കനത്തമഴയിലും കാറ്റിലുമായി മരം റോഡില്‍ വീണു കിടന്നിരുന്നു.ഇതിനോടൊപ്പം തന്നെ ഇലക്ട്രിക് പോസ്റ്റും ഉണ്ടായിരുന്നു. ഈ ലൈനില്‍ തട്ടി അക്ഷയിന് ഷോക്കേല്‍ക്കുകയായിരുന്നു
