അഹ്‍മദാബാദ്: ഗുജറാത്തിലെ അംറേലി ജില്ലയിൽ കളിക്കുന്നതിനിടയിൽ നാല് കുട്ടികൾ കാറിനുള്ളിൽ അകപ്പെട്ടു ശ്വാസംമുട്ടി മരിച്ചു. മരിച്ച കുട്ടികൾ രണ്ട് മുതൽ ഏഴ് വയസ് വരെ പ്രായമുള്ളവരാണ്. ശനിയാഴ്ചയായിരുന്നു അംറേലി ജില്ലയിലെ രാന്ധിയ ഗ്രാമത്തിൽ സംഭവം നടന്നത്. ഇക്കാര്യം പൊലീസ് ഉദ്യോഗസ്ഥർ മാധ്യമങ്ങളെ അറിയിച്ചത് തിങ്കളാഴ്ചയാണ്.
ഗ്രാമത്തിലെ ഒരു ഫാമിൽ ജോലി ചെയ്യുകയായിരുന്നു കുട്ടികളുടെ മാതാപിതാക്കൾ എല്ലാവരും. രാവിലെ 7.30ഓടെ മാതാപിതാക്കൾ ജോലിക്ക് പോയപ്പോൾ തങ്ങളുടെ ഏഴ് കുട്ടികൾ അവരുടെ താമസ സ്ഥലത്തായിരുന്നു ഉണ്ടായിരുന്നത്. കളിക്കുന്നതിനിടെ കുട്ടികളിൽ നാല് പേർ ഫാം ഉടമയുടെ കാറിൽ കയറി. വീടിന് സമീപത്ത് പാ‍ർക്ക് ചെയ്തിരിക്കുകയായിരുന്നു ഈ കാർ.
രാവിലെ 7.30ഓടെ ജോലിക്ക് പോയ മാതാപിതാക്കളും കാർ ഉടമയും വൈകുന്നേരം തിരിച്ചെത്തിയപ്പോൾ കാറിനുള്ളിൽ നാല് കുട്ടികളെ ചലനമറ്റ നിലയിൽ കണ്ടെത്തുകയായിരുന്നു. സംഭവത്തിൽ അപകട മരണത്തിന് പൊലീസ് കേസ് രജിസ്റ്റർ ചെയ്തു. വിശദമായ അന്വേഷണം നടത്തുകയാണെന്ന് അംറേലി പൊലീസ് പറഞ്ഞു.
