ന്യൂഡൽഹി: ഗുരുഗ്രാമിലേക്ക് പോകുകയായിരുന്ന ഥാർ ദേശീയപാതയിലെ ഡിവൈഡറിൽ ഇടിച്ചുകയറി അഞ്ചു പേർക്ക് ദാരുണാന്ത്യം. ഇന്ന് പുലർച്ചെ 4:30 നായിരുന്നു അപകടം. ഇരകൾ രാത്രി വൈകിയുള്ള ഒരു പാർട്ടിയിൽ പങ്കെടുത്ത് മടങ്ങുന്ന വഴിയാണ് അപകടം ഉണ്ടായതെന്നാണ് റിപ്പോർട്ട്. ദേശീയപാത 48 ലെ എക്സിറ്റ് 9 ൽ വെച്ചാണ് സംഭവം നടന്നത്.
വാഹനം ബാലൻസ് നഷ്ടപ്പെട്ട് ഡിവൈഡറിൽ നേരിട്ട് ഇടിക്കുകയായിരുന്നു. മൂന്ന് സ്ത്രീകളും രണ്ട് പുരുഷന്മാരും ഉൾപ്പെടെ അഞ്ച് പേർ സംഭവസ്ഥലത്ത് തന്നെ മരിച്ചു. ഗുരുതരമായി പരിക്കേറ്റ ഒരാളെ ഗുരുഗ്രാമിലെ മേദാന്ത ആശുപത്രിയിൽ പ്രവേശിപ്പിച്ചു. ഉത്തർപ്രദേശിൽ നിന്ന് ഗുഡ്ഗാവിലേക്ക് പോകുകയായിരുന്നു ഇവരെന്നാണ് ലഭിക്കുന്ന വിവരം. നിലവിൽ ചികിത്സയിലുള്ള വ്യക്തിയുടെ നില അതീവ ഗുരുതരമായി തുടരുകയാണ്. ഇടിയുടെ ആഘാതത്തിൽ വാഹനം പൂർണ്ണമായും തകർന്ന നിലയിലാണ്.
കഴിഞ്ഞ വർഷം സമാനമായ ഒരു സംഭവത്തിൽ, അമിതവേഗതയിൽ വന്ന ഒരു കാർ നിയന്ത്രണം വിട്ട് ലെയ്ൻ മാറിയതിന് ശേഷം മറ്റൊരു കാറിലും ഒരു മോട്ടോർ സൈക്കിളിലും ഇടിച്ചുകയറി രണ്ട് വിദ്യാർത്ഥികൾ മരിക്കുകയും മൂന്ന് പേർക്ക് പരിക്കേൽക്കുകയും ചെയ്തു. വാഹനത്തിന്റെ പിൻഭാഗത്തെ ടയർ പൊട്ടി കാർ റോഡിന്റെ മറുവശത്തേക്ക് തെറിച്ചുവീണതാണ് അപകട കാരണം.
