പത്തനംതിട്ട: പാർട്ടി ഔദ്യോഗികമായി തീരുമാനമെടുക്കുന്നതിന് മുൻപ് സ്ഥാനാർത്ഥികളെ സംബന്ധിച്ച സൂചനകൾ നൽകിയ പത്തനംതിട്ട ജില്ലാ സെക്രട്ടറി രാജു എബ്രഹാമിനെതിരെ സിപിഎം സംസ്ഥാന നേതൃത്വത്തിന്റെ നടപടി. വിഷയത്തിൽ അടിയന്തരമായി വിശദീകരണം നൽകാൻ സംസ്ഥാന സെന്റർ അദ്ദേഹത്തോട് ആവശ്യപ്പെട്ടു.
ആറന്മുളയിൽ വീണ ജോർജും കോന്നിയിൽ കെ.യു. ജനീഷ് കുമാറും തന്നെയാകും സ്ഥാനാർത്ഥികളെന്ന് മാധ്യമങ്ങളിലൂടെ രാജു എബ്രഹാം വെളിപ്പെടുത്തിയിരുന്നു. പാർട്ടിയുടെ കീഴ്വഴക്കങ്ങൾ ലംഘിച്ചാണ് ഈ പ്രഖ്യാപനമെന്നാണ് സംസ്ഥാന നേതൃത്വത്തിന്റെ വിലയിരുത്തൽ.
സ്ഥാനാർത്ഥി നിർണ്ണയം ഏത് പാർട്ടി ഘടകത്തിലാണ് ചർച്ച ചെയ്തത്? ഔദ്യോഗിക തീരുമാനത്തിന് മുൻപ് മാധ്യമങ്ങളോട് പ്രതികരിക്കാൻ ഇടയായ സാഹചര്യം എന്ത്? എന്നിവയാണ് വിശദീകരണം തേടിയ പ്രധാന കാര്യങ്ങൾ.
ഇമെയിൽ വഴിയാണ് സംസ്ഥാന നേതൃത്വം വിശദീകരണം ആവശ്യപ്പെട്ടിരിക്കുന്നത്. പാർട്ടി നടപടിക്രമങ്ങൾ പൂർത്തിയാകുന്നതിന് മുൻപേ പരസ്യ പ്രതികരണം നടത്തിയത് അച്ചടക്ക ലംഘനമാണെന്ന നിലപാടിലാണ് നേതൃത്വം
