കണ്ണൂര്: സംസ്ഥാനത്തെ മുഴുവന് ജയിലുകളിലും ഏപ്രില് ഒന്നു മുതല് മത്സ്യഫെഡ് മത്സ്യമെത്തിക്കും. 57 ജയിലുകളിലേക്കുമുള്ള മത്സ്യമെത്തിക്കാന് ജയില് വകുപ്പും മത്സ്യഫെഡും ധാരണയായി. തടവുകാര്ക്കുള്ള ഭക്ഷണ മെനുവില് ആഴ്ചയില് 2 ദിവസം മത്സ്യവിഭവമുണ്ട്
നിലവില് പ്രാദേശികമായാണ് മത്സ്യം വാങ്ങുന്നത്. ലഭ്യതക്കുറവു കാരണം ചില ഘട്ടങ്ങളില് മത്സ്യം കിട്ടാറില്ല. മത്സ്യഫെഡിനെ ഏല്പിക്കുന്നതോടെ മത്സ്യം ഹാര്ബറില്നിന്നു നേരിട്ട് ജയിലുകളിലെത്തിക്കും. ഈയിടെ വാങ്ങിയ ശീതീകരണ സൗകര്യമുള്ള 8 വാഹനങ്ങള് വിതരണത്തിനായി മത്സ്യഫെഡ് ഉപയോഗപ്പെടുത്തും.
25 മത്സ്യങ്ങളുടെ പട്ടിക മത്സ്യഫെഡ് ജയില് വകുപ്പിനു നല്കിയതില് മത്തി, അയല, ചൂര എന്നിവ അംഗീകരിച്ചിട്ടുണ്ട്. ഇവ കറിക്കഷണങ്ങളാക്കി ജയിലിലെത്തിക്കും. ജയില് കൗണ്ടറിലേക്കു മീന് അച്ചാര്, ഉണക്കച്ചെമ്മീന് അച്ചാര് എന്നിവയും മത്സ്യഫെഡ് നല്കും. പൊതുജനത്തിന് ഇവ വാങ്ങാന് കഴിയും. ജയിലിലേക്ക് മത്സ്യമെത്തിക്കുന്നതിലൂടെ മത്സ്യഫെഡിനു വരുമാനം വര്ധിപ്പിക്കാനാകുമെന്ന് എംഡി ഡോ. പി സഹദേവന് പറഞ്ഞു.
