ഡൽഹിയിൽ 22കാരിയായ സബില്ല ഖാത്തൂണിനെ കൊലപ്പെടുത്തിയ കേസിൽ ഭർത്താവിനെയും ഇയാളുടെ കാമുകിയെന്ന് ആരോപിക്കപ്പെടുന്ന യുവതിയെയും പൊലീസ് അറസ്റ്റ് ചെയ്തു. ബിഹാർ സ്വദേശികളായ എം.ഡി. ലാൽ ബാബു എന്ന സാഹിദ് അലി (22), റുഖ്സർ ഖാത്തൂൺ (22) എന്നിവരാണ് അറസ്റ്റിലായത്.
സാഹിദും സബില്ലയും പ്രണയിച്ച് വിവാഹിതരായവരാണെന്നും വിവാഹത്തിന് പിന്നാലെ ഒരു വർഷം മുമ്പ് ഡൽഹിയിലേക്ക് താമസം മാറിയതായും പൊലീസ് പറഞ്ഞു. ബിഹാറിലെ ഒരേ ജില്ലയിൽ നിന്നുള്ളവരായതിനാൽ സാഹിദിനും റുഖ്സറിനും നേരത്തെ പരിചയമുണ്ടായിരുന്നു. റുഖ്സർ പിന്നീട് ഡൽഹിയിലെത്തിയതോടെയാണ് ഇരുവരും തമ്മിലുള്ള ബന്ധം ആരംഭിച്ചതെന്നാണ് അന്വേഷണ സംഘത്തിന്റെ കണ്ടെത്തൽ.
റുഖ്സറിന്റെ ഫോണിലുണ്ടായിരുന്ന സാഹിദിന്റെ ചിത്രം ഭാര്യ സബില്ല വാലന്റൈൻസ് ഡേ സ്റ്റാറ്റസായി കണ്ടതോടെയാണ് ഭർത്താവിന്റെ ബന്ധം സംബന്ധിച്ച് സംശയം ഉയർന്നത്. ഇതിനെ തുടർന്ന് ദമ്പതികൾക്കിടയിൽ നിരന്തരം വഴക്കും തർക്കവും ഉണ്ടായിരുന്നതായി പൊലീസ് പറഞ്ഞു.
ഓഗസ്റ്റ് 29ന് സബില്ല ഒരു വയസ്സുള്ള മകനുമായി വീട്ടിൽ നിന്ന് പുറത്തുപോയി. ഈ സമയത്ത് സാഹിദ് റുഖ്സറിനെ വീട്ടിലേക്ക് വിളിച്ചുവരുത്തിയെന്നാണ് പൊലീസ് ആരോപണം. സബില്ല തിരിച്ചെത്തിയപ്പോൾ ഇരുവരും ചേർന്ന് അവളെ ബാത്ത്റൂമിലേക്ക് കൊണ്ടുപോയി ആക്രമിച്ചെന്നാണ് അന്വേഷണത്തിൽ കണ്ടെത്തിയത്. ആക്രമണത്തിനിടെ തല ഇടിച്ചതിനെ തുടർന്ന് ഗുരുതരമായി പരിക്കേറ്റ് രക്തസ്രാവമുണ്ടാവുകയും തുടർന്ന് മരണം സംഭവിക്കുകയും ചെയ്തതായി പൊലീസ് പറഞ്ഞു.
സംഭവത്തിന് ശേഷം സാഹിദ് സബില്ലയെ കാണാനില്ലെന്ന് പറഞ്ഞ് ഡൽഹിയിൽ താമസിക്കുന്ന അവളുടെ സഹോദരനെ ഫോണിൽ ബന്ധപ്പെട്ടു. വീട്ടിലെത്തിയ സഹോദരൻ സബില്ലയെ ബാത്ത്റൂമിൽ മരിച്ചനിലയിൽ കണ്ടെത്തുകയും പൊലീസിനെ വിവരമറിയിക്കുകയും ചെയ്തു.
സംഭവത്തിൽ ഭാരതീയ ന്യായ സംഹിതയിലെ സെക്ഷൻ 103(1) പ്രകാരം ഷഹ്ബാദ് ഡയറി പൊലീസ് സ്റ്റേഷനിൽ കൊലപാതകക്കേസ് രജിസ്റ്റർ ചെയ്തു. ഡെപ്യൂട്ടി പൊലീസ് കമ്മീഷണർ ശോഭിത് ഡി. സക്സേനയുടെ നിർദേശപ്രകാരം എസിപി ഗൗരവ് സിംഗിന്റെ നേതൃത്വത്തിൽ പ്രത്യേക അന്വേഷണസംഘം രൂപീകരിച്ചു.
കൊലപാതകത്തിന് പിന്നാലെ സാഹിദ് മകനുമായി ഡൽഹിയിൽ നിന്ന് രക്ഷപ്പെട്ടതായി പൊലീസ് പറഞ്ഞു. നോയിഡയിലെ ബന്ധുവായ എം.ഡി. ഒസാമയുടെ വീട്ടിൽ ഇയാൾ അഭയം തേടിയെന്നും തുടർന്ന് ബിഹാറിലേക്ക് കടക്കാൻ ഒസാമ സഹായിച്ചെന്നുമാണ് ആരോപണം. ഒസാമയെ നേരത്തെ അറസ്റ്റ് ചെയ്തിരുന്നു. ഇയാൾ നിലവിൽ ജുഡീഷ്യൽ കസ്റ്റഡിയിലാണ്.
തുടർന്ന് സാഹിദ് മുംബൈയിലെത്തിയെന്നും റുഖ്സർ ഡൽഹിയിൽ തന്നെ തുടരുകയായിരുന്നുവെന്നും പൊലീസ് പറഞ്ഞു. അന്വേഷണത്തിൽ നിന്ന് രക്ഷപ്പെടാൻ സാഹിദ് തന്റെ മൊബൈൽ ഫോൺ ബിഹാറിലെ ഒരു ഓട്ടോറിക്ഷയിൽ ഉപേക്ഷിക്കുകയും പിന്നീട് ഇന്റർനെറ്റ് കോളുകൾ മാത്രം ഉപയോഗിക്കുകയും ചെയ്തതായും പൊലീസ് ആരോപിച്ചു.
ഡൽഹി, ഗാസിയാബാദ്, നോയിഡ, പട്ന, സീതാമർഹി, മുസാഫർപൂർ, മുംബൈ എന്നിവിടങ്ങളിലായി 300ലേറെ സിസിടിവി ക്യാമറകളിലെ ദൃശ്യങ്ങൾ പരിശോധിച്ചാണ് അന്വേഷണസംഘം പ്രതികളിലേക്ക് എത്തിയത്. തുടർന്നാണ് സാഹിദിനെയും റുഖ്സറിനെയും കൊലപാതകത്തിൽ പങ്കുണ്ടെന്ന ആരോപണത്തിൽ അറസ്റ്റ് ചെയ്തത്. സംഭവത്തിൽ കൂടുതൽ അന്വേഷണം തുടരുകയാണെന്ന് പൊലീസ് അറിയിച്ചു.
