സ്വന്തം ജീവൻ അപകടത്തിലായപ്പോഴും യാത്രക്കാരുടെ സുരക്ഷയ്ക്ക് മുൻഗണന നൽകി അവസാന നിമിഷം വരെ ഉത്തരവാദിത്തം നിറവേറ്റിയ ആന്ധ്രാപ്രദേശ് സ്റ്റേറ്റ് റോഡ് ട്രാൻസ്‌പോർട്ട് കോർപ്പറേഷൻ (APSRTC) ബസ് ഡ്രൈവർ ജെട്ടി ശിവയുടെ വിയോഗം നാടിനെ ദുഃഖത്തിലാഴ്ത്തി. ഹൃദയാഘാതത്തെ തുടർന്ന് ശാരീരികാവസ്ഥ വഷളായിട്ടും ബസ് സുരക്ഷിതമായി റോഡരികിൽ നിർത്തി 40 ഓളം യാത്രക്കാരുടെ ജീവൻ രക്ഷിച്ച ശേഷമാണ് 34 -കാരനായ ശിവ കുഴഞ്ഞുവീണതെന്ന് റിപ്പോർട്ടുകൾ.
*നെഞ്ചുവേദന ; കൈവിടാതെ സ്റ്റിയറിംഗ്*
ഒക്ടോബർ എട്ടിന് വ്യാഴാഴ്ചയാണ് സംഭവം നടന്നത്. കാക്കിനാഡയിൽനിന്ന് വിശാഖപട്ടണത്തേക്ക് പോകുകയായിരുന്ന എപിഎസ്ആർടിസി ബസിൽ ഏകദേശം 40 യാത്രക്കാരുണ്ടായിരുന്നു. യാത്രയ്ക്കിടെ തുനിക്ക് സമീപം എത്തിയപ്പോഴാണ് ശിവയ്ക്ക് ഹൃദയാഘാതമുണ്ടായതായാണ് റിപ്പോർട്ടുകൾ പറയുന്നത്. കടുത്ത അസ്വസ്ഥത അനുഭവപ്പെട്ടിട്ടും നിയന്ത്രണം കൈവിടാതെ ബസ് റോഡരികിലേക്ക് മാറ്റി സുരക്ഷിതമായി നിർത്താൻ അദ്ദേഹത്തിന് സാധിച്ചു.
ബസ് നിർത്തിയതിന് പിന്നാലെ ഡ്രൈവർ സീറ്റിൽത്തന്നെ ശിവ കുഴഞ്ഞുവീഴുകയായിരുന്നു. എന്താണ് സംഭവിച്ചതെന്ന് മനസ്സിലാക്കിയ യാത്രക്കാർ പെട്ടെന്ന് തന്നെ അദ്ദേഹത്തിന്‍റെ അടുത്തെത്തി സഹായിക്കാൻ ശ്രമിച്ചു. തുടർന്ന് ശിവയെ സമീപത്തെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ആശുപത്രിയിൽ എത്തുമ്പോഴേക്കും മരണം സംഭവിച്ചതായി അധികൃതർ അറിയിച്ചു.
*ഒഴിവാക്കിയത് വൻ ദുരന്തം*
ബസ് ഓടിക്കൊണ്ടിരിക്കെ ഡ്രൈവർക്ക് ഗുരുതരമായ ആരോഗ്യപ്രശ്നമുണ്ടായ സാഹചര്യത്തിൽ വാഹനം നിയന്ത്രണംവിട്ട് അപകടത്തിൽപ്പെടാനുള്ള സാധ്യതയുണ്ടായിരുന്നു. എന്നാൽ, അവസാന നിമിഷം വരെ ശാന്തതയും ഉത്തരവാദിത്തബോധവും കൈവിടാതെ വാഹനം സുരക്ഷിതമായി നിർത്തിയ ശിവയുടെ നടപടി വലിയ അപകടം ഒഴിവാക്കാൻ സഹായിച്ചു.
എപിഎസ്ആർടിസി ചെയർമാൻ കൊണകല്ല നാരായണ റാവു, ശിവയുടെ വിയോഗത്തിൽ അനുശോചനം രേഖപ്പെടുത്തി. പ്രതിസന്ധി ഘട്ടത്തിലും യാത്രക്കാരുടെ സുരക്ഷയ്ക്ക് പ്രാധാന്യം നൽകിയ അദ്ദേഹത്തിന്‍റെ പ്രവർത്തിയെ ചെയർമാൻ അഭിനന്ദിച്ചു. ശിവയുടെ കുടുംബത്തിന് ബാധകമായ ചട്ടങ്ങൾ അനുസരിച്ച് ആവശ്യമായ സഹായവും പിന്തുണയും നൽകുമെന്നും അദ്ദേഹം ഉറപ്പുനൽകി.
