എടപ്പാൾ : എടപ്പാളിൽ പുറകോട്ട് എടുത്ത കാർ മതിലിൽ ഇടിച്ചുണ്ടായ അപകടത്തിൽ നാലു വയസ്സുകാരി മരിച്ചു. എടപ്പാൾ സ്വദേശി മഠത്തിൽ വളപ്പിൽ ജാബിറിന്റെ മകൾ നാലു വയസ്സുള്ള അംറു ബിൻത് ആണ് മരിച്ചത്. മഠത്തിൽ വളപ്പിൽ ഷാഹിറിന്റെ മകൾ അലിയ, 46 വയസ്സുള്ള സിത്താര 61 വയസ്സുള്ള സുബൈദ എന്നിവർക്കാണ് പരിക്കേറ്റത്. ഇവരെ എടപ്പാളിലെ സ്വകാര്യ ആശുപത്രിയിൽ പ്രവേശിപ്പിച്ചു. ഗുരുതരമായി പരിക്കേറ്റ അലിയയെ കോട്ടക്കലിലെ സ്വകാര്യ ആശുപത്രിയിലേക്ക് മാറ്റി. വെള്ളിയാഴ്ച രാത്രി 11 30 ഓടെ എടപ്പാൾ ഹൈസ്കൂളിന് സമീപത്തെ വീട്ടിലാണ് ദാരുണമായ അപകടം നടന്നത്. ബന്ധുക്കളാണ് അപകടത്തിൽപ്പെട്ടത്. ഇവരുടെ വീട്ടിൽ നിർത്തിയിട്ട കാർ സ്റ്റാർട്ട് ചെയ്തതോടെ പെട്ടെന്ന് റിവേഴ്സ് വന്ന് മതിലിൽ ഇടിക്കുകയായിരുന്നു കാറിനു പുറകിൽ നിന്നിരുന്നവരാണ് അപകടത്തിൽപ്പെട്ടത്.
