ആലപ്പുഴ: മാട്രിമോണിയൽ ആപ്പിൽ സൗഹൃദം സ്ഥാപിച്ച് യുവാവിൽ നിന്ന് 22.67 ലക്ഷം രൂപ തട്ടിയെടുത്ത കേസിൽ പോലീസ് അന്വേഷണം ഊർജിതമാക്കി. കഴിഞ്ഞ ഓഗസ്റ്റ് മുതൽ ഡിസംബർ 31 വരെയുള്ള കാലയളവിൽ നടന്ന ഈ തട്ടിപ്പിൽ കേന്ദ്രസർക്കാർ ജീവനക്കാരനായ യുവാവിന്റെ പരാതിയുടെ അടിസ്ഥാനത്തിലാണ് അന്വേഷണം നടക്കുന്നത്.
ബിറ്റ്കോയിൻ ഷെയർമാർക്കറ്റിൽ നിക്ഷേപിച്ചാൽ സാമ്പത്തിക ലാഭവും സുരക്ഷയും ഉണ്ടാകുമെന്ന് വിശ്വസിപ്പിച്ചായിരുന്നു യുവാവ് പണം നൽകിയത്. പല തവണ യുവാവിന്റെ ബാങ്ക് അക്കൗണ്ടിൽ നിന്ന് യുവതിയുടെ അക്കൗണ്ടിലേക്കു പണം അയച്ചെങ്കിലും, യുവതി പറഞ്ഞ ലാഭവും നൽകിയ തുകയും ലഭിച്ചില്ല. സംശയം തോന്നിയ യുവാവ് പിന്നീട് പോലീസിൽ പരാതി നൽകി. യു.പി.ഐ. വഴിയും പണം നൽകിയതായി പൊലീസ് വ്യക്തമാക്കി. ബാങ്ക് അക്കൗണ്ടിലൂടെ മാത്രം 20-ലേറെ തവണ പണം തട്ടിയെടുത്തതായി പൊലീസ് കണ്ടെത്തി.
തട്ടിപ്പുകാരി മാട്രിമോണിയൽ സൈറ്റിൽ ഉപയോഗിച്ച ഐഡി വ്യാജമാണെന്ന സംശയം ഉണ്ട്. പ്രതിയും യുവാവും ഫോണിലൂടെ സംസാരിച്ചിട്ടുണ്ടെന്നും, സംഭവ സമയത്ത് യുവാവ് ജോലിക്കായി സംസ്ഥാനത്തിന് പുറത്തായിരിക്കുകയായിരുന്നുവെന്നും അധികൃതർ അറിയിച്ചു.
തട്ടിപ്പ് സംബന്ധിച്ച അന്വേഷണത്തിന്, യുവാവ് പണം നൽകിയ ബാങ്ക് അക്കൗണ്ടുകളും ഇരുവരും തമ്മിൽ ഉപയോഗിച്ച ഫോൺ നമ്പറുകളും കേന്ദ്രീകരിച്ച് അന്വേഷണം പുരോഗമിക്കുന്നുണ്ട്. ഇതിനു മുമ്പും മാട്രിമോണിയൽ സൈറ്റുകളും ആപ്പുകളും വഴി തട്ടിപ്പുകൾ ജില്ലയിൽ നടന്നിട്ടുണ്ട്. ചില കേസുകളിൽ പ്രതികളെ പിടികൂടാൻ പൊലീസ് കഴിഞ്ഞിട്ടുണ്ട്
