കൊൽക്കത്ത: ദുർഗാപൂജാ ആഘോഷത്തിനിടെ കൊൽക്കത്തയിൽ വൻ ദുരന്തം. പൂജാ പന്തലിലേക്ക് ആളുകൾ കൂട്ടത്തോടെ തള്ളിക്കയറിയതിനെത്തുടർന്നുണ്ടായ തിക്കിലും തിരക്കിലും 19 പേർ മരിച്ചതായും 35 ഓളം പേർക്ക് പരിക്കേറ്റതായും ദേശീയ മാധ്യമങ്ങൾ റിപ്പോർട്ട് ചെയ്തു. വടക്കൻ കൊൽക്കത്തയിലെ ചോർബഗാനിലാണ് അപകടമുണ്ടായത്. പരിക്കേറ്റവരിൽ ചിലരുടെ നില അതീവ ഗുരുതരമാണെന്നാണ് വിവരം.
ശനിയാഴ്ച വൈകുന്നേരമാണ് നാടിനെ നടുക്കിയ സംഭവം. വൈകുന്നേരം ഏഴ് മണിയോടെ പ്രദേശത്ത് ശക്തമായ മഴയും മിന്നലുമുണ്ടായി. മഴയിൽനിന്ന് രക്ഷനേടാൻ പൂജയ്ക്കെത്തിയവർ ഒരേസമയം പന്തലിനുള്ളിലേക്ക് പ്രവേശിക്കാൻ ശ്രമിച്ചതാണ് ദുരന്തത്തിന് വഴിവെച്ചതെന്നാണ് പ്രാഥമിക വിലയിരുത്തൽ. ഇടുങ്ങിയ പ്രവേശന കവാടത്തിലൂടെ വൻ ജനക്കൂട്ടം തള്ളിക്കയറിയതോടെ നിയന്ത്രണം നഷ്ടപ്പെടുകയും ആളുകൾ പരസ്പരം വീഴുകയും ചെയ്തു.
സംഭവത്തെത്തുടർന്ന് സ്ഥലത്തെത്തിയ ദുരന്തനിവാരണ സേന രക്ഷാപ്രവർത്തനം നടത്തി. പരിക്കേറ്റവരെ കൊൽക്കത്ത മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. മുഖ്യമന്ത്രി സുവേന്ദു അധികാരിയും ആരോഗ്യമന്ത്രി ശാരദ്വത് മുഖർജിയും ഉൾപ്പെടെയുള്ളവർ ആശുപത്രിയിലെത്തി സ്ഥിതിഗതികൾ വിലയിരുത്തി. അപകടത്തിൽ പ്രധാനമന്ത്രി നരേന്ദ്ര മോദി അനുശോചനം രേഖപ്പെടുത്തി. മരിച്ചവരുടെ കുടുംബങ്ങൾക്ക് കേന്ദ്രസർക്കാർ രണ്ട് ലക്ഷം രൂപയും സംസ്ഥാന സർക്കാർ 25 ലക്ഷം രൂപയും ധനസഹായം പ്രഖ്യാപിച്ചതായാണ് റിപ്പോർട്ട്.
