കൊച്ചി: പ്രായപൂർത്തിയാകാത്തവർ വാഹനമോടിക്കുന്ന സംഭവങ്ങളിൽ രക്ഷിതാവിനെയോ വാഹന ഉടമയെയോ കുറ്റക്കാരായി കണക്കാക്കുന്ന മോട്ടോർ വാഹന വകുപ്പിന്റെ നിയമത്തിനെതിരെ ഹൈക്കോടതിയിൽ ഹർജി. മോട്ടോർ വാഹന നിയമത്തിലെ 199 എ വകുപ്പിൻ്റെ ഭരണഘടനാപരമായ സാധുത ചോദ്യം ചെയ്തുള്ളതാണ് ഹർജി.
പ്രായപൂർത്തിയാകാത്തയാളെ കുറ്റകൃത്യം ചെയ്യാൻ രക്ഷിതാവ് സഹായിക്കുകയോ പ്രേരിപ്പിക്കുകയോ ചെയ്യാത്ത കേസുകളിൽ പോലും 199 എ വകുപ്പ് പ്രകാരം വാഹനത്തിൻറെ ഉടമക്കോ രക്ഷിതാവിനോ മൂന്ന് വർഷം വരെ തടവ് ശിക്ഷ ലഭിക്കാം. മോട്ടോർ വാഹന നിയമത്തിലെ 180-ഉം 181-ഉം വകുപ്പുകൾ പ്രകാരം പ്രായപൂർത്തിയാകാത്തവരോ ലൈസൻസില്ലാതെ പ്രായപൂർത്തിയായവരോ വാഹനമോടിക്കുന്നതും ശിക്ഷാർഹമാണ്. ഈ രണ്ട് വകുപ്പുകൾക്കും പരമാവധി തടവ് മൂന്ന് മാസമാണ്. എന്നാൽ, സെക്ഷൻ 199 എ പ്രകാരം വാഹനത്തിന്റെ രക്ഷിതാവോ ഉടമയോ മൂന്നു വർഷം തടവിന് ശിക്ഷിക്കപ്പെടാം.
മോട്ടോർ വാഹന വകുപ്പിന്റെ ഈ നിയമങ്ങളുടെ ഭരണഘടനാ സാധുത ചോദ്യം ചെയ്ത് സമർപ്പിച്ച ഹർജിയിൽ ജസ്റ്റിസ് ബച്ചു കുര്യൻ തോമസ് എതിർകക്ഷികൾക്ക് നോട്ടീസയച്ചു. ഹർജി ഡിസംബർ പത്തിന് പരിഗണിക്കാൻ മാറ്റി.
