തിരുവനന്തപുരം : വ്യാജ രജിസ്ട്രേഷൻ സർട്ടിഫിക്കറ്റ് നിർമിച്ച് സംരക്ഷിത സംരക്ഷിത ജീവിയായ ഗ്രീൻ ഇഗ്വാനയെ വിൽപന നടത്താൻ ശ്രമിച്ചയാൾ പിടിയിൽ. തിരുവനന്തപുരം തിരുമലയ്ക്കടുത്ത്’ പെറ്റ് ഷോപ്പ് നടത്തിയിരുന്ന ബിനോയ് (32) ആണ് പിടിയിലായത്. വനംവകുപ്പിന്റെ പ്രത്യേക അന്വേഷണത്തിൽ ഇയാളുടെ കൈവശമുണ്ടായിരുന്ന വിദേശ ജീവിയായ ഇഗ്വാനയെ കണ്ടെത്തി. 1972-ലെ വന്യജീവി സംരക്ഷണ നിയമ ഭേദഗതി (2022) പ്രകാരം സംരക്ഷിത വിഭാഗത്തിൽപെട്ട ജീവിയാണ് ഇത്. ഇതിനെ കൈവശം വെക്കാനും വിൽപന നടത്താനും ചീഫ് വൈൽഡ് ലൈഫ് വാർഡന്റെ അനുമതി നിർബന്ധമാണ്. ചിഫ് വൈൽഡ് ലൈഫ് വാർഡന്റെ പേരിൽ വ്യാജ സർട്ടിഫിക്കറ്റ് ഉപയോഗിച്ചാണ് ഇയാൾ വിൽപന നടത്തിവന്നതെന്നായിരുന്നു വിവരം.
എന്നാൽ, ബെംഗ്ളൂരു കേന്ദ്രീകരിച്ചുള്ള സംഘമാണ് വ്യാജ സർട്ടിഫിക്കറ്റ് നിർമാണത്തിന് പിന്നിലെന്നാണ് പ്രാഥമിക നിഗമനം. പരുത്തിപ്പള്ളി റേഞ്ച് ഓഫീസർ വി. വിപിൻ ചന്ദ്രൻ, ഡെപ്യൂട്ടി റേഞ്ച് ഓഫീസർ അനിൽ കുമാർ, എസ്എഫ്ഒ ജിജുമോൻ, ബീറ്റ് ഫോറസ്റ്റ് ഓഫീസർമാരായ ജി.എസ് റോഷ്നി കാവ്യ എസ്. നായർ, രമ്യ, എന്നിവരടങ്ങുന്ന സംഘമാണ് പ്രതിയെ അറസ്റ്റ് ചെയ്ത് കോടതിയിൽ ഹാജരാക്കിയത്. തനിക്ക് ലഭിച്ചത് വ്യാജ സർട്ടിഫിക്കറ്റാണെന്ന് അറിയാതെ വിൽപ്പന നടത്തിയെന്നാണ് യുവാവിന്റെ മൊഴി. വ്യാജരേഖ ചമയ്ക്കൽ കേസിൽ വിശദമായ അന്വേഷണം നടത്തി മുഴുവൻ പ്രതികളെയും നിയമത്തിന് മുന്നിൽ കൊണ്ടുവരുമെന്ന് വനം വകുപ്പ് ഉദ്യോഗസ്ഥർ അറിയിച്ചു.
