ആലക്കോട്: വിദ്യാർഥികളുമായി സ്കൂളിലേക്ക് പോകുകയായിരുന്ന ജീപ്പ് അപകടത്തിൽപ്പെട്ടു. 13 കുട്ടികൾക്ക് പരിക്ക്. രയരോം പൊടിക്കാനത്ത് വ്യാഴാഴ്ച രാവിലെ ഒൻപത് മണിയോടെയായിരുന്നു അപകടമുണ്ടായത്. ഇറക്കമിറങ്ങി വന്ന ജീപ്പിന്റെ നിയന്ത്രണം നഷ്ടമായതിനെത്തുടർന്ന് റോഡരികിലെ പാറക്കല്ലിലും സമീപത്തുണ്ടായിരുന്ന മരത്തിലും ഇടിച്ച് നിൽക്കുകയായിരുന്നു.
രയരോം സെന്റ് സെബാസ്റ്റ്യന്‍സ് ഇംഗ്ലീഷ് മീഡിയം സ്‌കൂളിലെ കുട്ടികളുമായി സ്കൂളിലേക്ക് പോകുകയായിരുന്ന ജീപ്പാണ് അപകടത്തിൽപെട്ടത്. വാഹനത്തിനുള്ളിൽ 17 വിദ്യാഥികളാണുണ്ടായിരുന്നത്. പരിക്കേറ്റ കുട്ടികളെ ഉടൻ തന്നെ നാട്ടുകാർ ചേർന്ന് ആലക്കോട്ടെ സ്വകാര്യ ആശുപത്രിയിലെത്തിച്ചു. ആർക്കും ഗുരുതര പരിക്കുകളില്ല. വാഹനം സ്ഥിരമായി ഓടിക്കുന്ന ഡ്രൈവർ ഇടക്കുവച്ച് മറ്റൊരു ഡ്രൈവർക്ക് ജീപ്പ് കൈമാറിയിരുന്നു. ഇയാൾക്ക് റോഡ് അത്ര സുപരിചിതമല്ലാതിരുന്നതാണ് അപകടത്തിന് കാരണമെന്നാണ് പ്രാഥമിക നിഗമനം. മരത്തിലിടിച്ച ജീപ്പിന്റെ മുൻഭാഗം തകർന്നു.
