ഹാങ്ചൗ: ഏഷ്യൻ ഗെയിംസിൽ ഇന്ത്യയ്ക്ക് മൂന്നാം സ്വർണം. അശ്വാഭ്യാസം (ഡ്രെസ്സേജ്) വിഭാഗത്തിലാണ് ഇന്ത്യൻ ടീം സ്വർണം നേടിയത്. ഈ ഇനത്തിൽ 41 വർഷങ്ങൾക്ക് ശേഷമാണ് ഇന്ത്യ സ്വർണം അണിയുന്നത്. സുദീപ്തി ഹജേല, ദിവ്യകൃതി സിങ്, ഹൃദയ് ഛേദ, അനുഷ് അഗർവാല എന്നിവരുടെ സംഘമാണ് സുവർണത്തിളക്കം നേടിയെടുത്തത്. 209.205 സ്കോർ നേടിയാണ് ഇന്ത്യയുടെ മെഡൽ നേട്ടം. മുമ്പ് 1982ലാണ് ഇന്ത്യ ഈ ഇനത്തിൽ അവസാനമായി സ്വർണം നേടിയത്.
അനുഷ് അഗർവാലയുടെ കുതിരയായ ഇ ടി ആർ ഒ (ETRO) 71.088 എന്ന ഉയർന്ന സ്കോർ നേടി. ഹൃദയ് ഛേദ 69.941 സ്കോർ ചെയ്തു. ദിവ്യകൃതി സിംഗിന്റെ കുതിരയായ അഡ്രിനാലിൻ ഫിർദോദ് 68.176 സ്കോറാണ് നേടിയത്. സുദീപ്തി ഹജേല വക 66.706 സ്കോർ ലഭിച്ചു. ഈ വിഭാഗത്തിൽ ചൈനയ്ക്കാണ് രണ്ടാം സ്ഥാനം.
ഏഷ്യൻ ഗെയിംസിൽ ഇന്ത്യയുടെ മൂന്നാം സ്വർണമാണിത്. 14 മെഡലോടെ ഇന്ത്യ ആറാം സ്ഥാനത്ത് തുടരുകയാണ്. നാല് വെള്ളിയും ഏഴ് വെങ്കലവും ഇന്ത്യൻ താരങ്ങൾ ഇതിനോടകം സ്വന്തമാക്കി. ഏഷ്യൻ ഗെയിംസിന്റെ മൂന്നാം ദിനം ഇന്ത്യ ഇതുവരെ മൂന്ന് മെഡലുകൾ സ്വന്തമാക്കി. മെഡൽ പട്ടികയിൽ ചൈനയാണ് ഒന്നാമത്
