ലൊസാഞ്ചലസ്: ആധിപത്യം നിറഞ്ഞ പ്രകടനവുമായി ഓസ്ട്രിയയെ മറുപടിയില്ലാത്ത മൂന്ന് ഗോളിന് കീഴടക്കി സ്പെയിൻ ഫിഫ ലോകകപ്പിന്റെ പ്രീക്വാർട്ടറിലേക്ക്. മികേൽ ഒയർസബാലിന്റെ ഇരട്ടഗോളുകളും (36, 86) പെഡ്രോ പൊറോയുടെ (66) അരങ്ങേറ്റ ഗോളുമാണ് സ്പാനിഷ് ടീമിന് അനായാസ ജയം സമ്മാനിച്ചത്. അടുത്ത റൗണ്ടിൽ പോർച്ചുഗൽ–ക്രൊയേഷ്യ പോരാട്ടത്തിലെ വിജയികളെയാണ് സ്പെയിൻ നേരിടുക.
മത്സരത്തിന്റെ തുടക്കം മുതൽ തന്നെ പന്തടക്കത്തിലും ആക്രമണങ്ങളിലും സ്പെയിൻ വ്യക്തമായ മേൽക്കൈ പുലർത്തി. ആകെ 22 ഗോൾശ്രമങ്ങളും 10 ഓൺടാർഗറ്റ് ഷോട്ടുകളും സ്പെയിൻ നടത്തിയപ്പോൾ, ഓസ്ട്രിയയ്ക്ക് മത്സരത്തിലുടനീളം ഒരു ഷോട്ട് പോലും ലക്ഷ്യത്തിലേക്ക് എത്തിക്കാനായില്ല.
ആദ്യ പകുതിയിൽ ലമീൻ യമാൽ, ദാനി ഓൽമോ, അയ്മെറിക് ലപോർട്ട് എന്നിവരുടെ തുടർച്ചയായ മുന്നേറ്റങ്ങളിലൂടെ സ്പെയിൻ ഓസ്ട്രിയൻ പ്രതിരോധത്തെ സമ്മർദത്തിലാക്കി. 29-ാം മിനിറ്റിൽ മാർക് കുകുറെല നേടിയെന്ന് കരുതിയ ഗോൾ ഫൗളിനെ തുടർന്ന് റഫറി അനുവദിച്ചില്ല. എന്നാൽ 36-ാം മിനിറ്റിൽ കുകുറെലയുടെ കൃത്യമായ ക്രോസ് വലയിലെത്തിച്ച് മികേൽ ഒയർസബാൽ സ്പെയിന് ലീഡ് സമ്മാനിച്ചു. ലോകകപ്പിൽ താരത്തിന്റെ മൂന്നാം ഗോളായിരുന്നു അത്.
ഗോൾ നേടിയ ശേഷവും ആക്രമണം തുടർന്ന സ്പെയിൻ കൂടുതൽ അവസരങ്ങൾ സൃഷ്ടിച്ചെങ്കിലും ആദ്യ പകുതി അവസാനിക്കുമ്പോൾ സ്കോർ 1–0 എന്ന നിലയിലായിരുന്നു.
രണ്ടാം പകുതിയിലും കളിയുടെ നിയന്ത്രണം സ്പെയിന്റെ കൈകളിലായിരുന്നു. 66-ാം മിനിറ്റിൽ അലക്സ് ബെനയുടെ മനോഹരമായ ക്രോസിൽ ഹെഡറിലൂടെ പെഡ്രോ പൊറോ സ്പാനിഷ് ദേശീയ ടീമിനായി തന്റെ ആദ്യ ഗോൾ നേടി ലീഡ് ഇരട്ടിയാക്കി.
മത്സരത്തിന്റെ അവസാന നിമിഷങ്ങളിലും സ്പെയിൻ ആക്രമണത്തിന്റെ മൂർച്ച കുറച്ചില്ല. 86-ാം മിനിറ്റിൽ വീണ്ടും കുകുറെലയുടെ ക്രോസിൽ നിന്ന് ഒയർസബാൽ വലകുലുക്കി സ്വന്തം ഇരട്ടഗോളും ടീമിന്റെ മൂന്നാം ഗോളും നേടി. ശേഷിച്ച സമയത്ത് ഓസ്ട്രിയയ്ക്ക് തിരിച്ചുവരവിന് യാതൊരു അവസരവും ലഭിച്ചില്ല.
അവസാന വിസിൽ മുഴങ്ങിയപ്പോൾ 3–0 എന്ന ഏകപക്ഷീയ സ്കോറിൽ വിജയം ഉറപ്പിച്ച സ്പെയിൻ ആത്മവിശ്വാസത്തോടെ പ്രീക്വാർട്ടറിലേക്ക് മുന്നേറി.
